Almaty oblysynda 24 jastaǵy Janasyl Sarsenbaıdy óltirý isi boıynsha sot prosesi bastaldy: Qaskeleńde 19 jáne 20 jastaǵy úsh jas jigit sot aldynda tur. Onyń bireýine óltirý, qalǵan ekeýine qylmysty jasyrý aıyby taǵyldy, dep habarlaıdy infohub.kz saıty.
Sot otyrystary ashyq túrde ótip jatyr, alaıda sottalýshylar betterin kórsetýge qarsy boldy. Qaıǵyly oqıǵa mamyr aıynda Talǵar aýdanynda bolǵan. Marqumnyń týystarynyń aıtýynsha, Janasyl inisimen birge ákesiniń qabirin zıarat etýge barypty. Aǵaıyndylar úıge qaıtyp kele jatqanda, joldy aýyldastarynyń kóligi kesip ótken.
Janasyl dybys sıgnalyn bergen, biraq jol berilmegen. Sodan keıin ol kólikti joǵary jyldamdyqpen aınalyp ótken. Týystarynyń pikirinshe, bul jas jigitterdi ashýlandyryp, olar aǵaıyndylardy úılerine deıin qýyp barǵan.
Sottalýshylardyń biri jol janjalynan keıingi oqıǵalardyń óz nusqasyn aıtty: «Júrgizýshi bizge sıgnal bere bastady. Elhan oǵan aınalyp ótýge belgi berdi. Janasyl Elhanǵa birdeńe aıtty, balaǵattaǵan sıaqty, sodan keıin joǵary jyldamdyqpen qasymyzdan ótip ketti. Biz olardyń sońynan erdik. Úıge jaqyndaǵanda Elhan jalǵyz shyqty. Ol Janasyldy pyshaqpen urdy. Sosyn maǵan: „Gazda!“ — dedi. Pyshaqty kórgende shok kúıinde qaldym».
Marqumnyń inisi shabýyldyń basqasha sýretin kórsetti. Onyń aıtýynsha, kólikten úsheýi shyqqan, al pyshaq jaraqatyna deıin eshqandaı áńgime bolmaǵan: «Úsheýiniń shyqqanyn kórdik. Men jolaýshylar jaǵynda turdym. Eshqandaı áńgime bolǵan joq. Kenetten Elhan aǵama eki pyshaqpen urdy: aldymen oń qolymen, sosyn sol qolymen», — dedi Erkebulan Sarsenbaı.
Janasyl aýrýhanada kóz jumdy. Onyń anasy sotta sottalýshylardy keshirmeıtinin málimdep, eń aýyr jazany talap etti: «Ulym: „Apa, aǵamdy pyshaqtap tastady“, — dep júgirip keldi. Men dalaǵa júgirip shyqtym. Janasyl tizerlep otyr eken. Men ony qushaqtadym. Jedel járdem shaqyrdyq. Sosyn aýrýhanaǵa ózimiz aparaıyq dedik. Al dárigerler maǵan: „Ulyńyz qaıtys boldy“, — dedi. Keshirmeımin. Muny keshirý múmkin emes. Osy úsheýi qylmysy úshin jazasyn tartsyn. Ómirleriniń sońyna deıin túrmede otyrsyn», — dedi Almagúl Nurǵızat.
Jábirlenýshi tarap sottalýshylardan 100 mln teńge kóleminde ótemaqy óndirýdi de talap etti. Aıyptar «Óltirý» jáne «Qylmysty jasyrý» baptary boıynsha qoıylǵan. Sot talqylaýy jalǵasýda.