Almaty oblysynyń agroónerkásip kesheniniń eksport kólemi 2025 jyldyń qorytyndysy boıynsha 491 mln dollardan asty, al óńirdiń aýyl sharýashylyǵy taýarlary men qaıta óńdelgen ónimderi álemniń 50-den astam eline jetkizilýde. Óńirlik eksporttyń jalpy kóleminiń 60%-dan astamy aýyl sharýashylyǵy ónimderi men olardyń qaıta óńdelgen taýarlaryna tıesili, dep habarlaıdy infohub.kz saıty.
Qazaqstan Aýyl sharýashylyǵy mınıstrliginiń málimetinshe, Almaty oblysy eldiń eksporttyq baǵyttaǵy agrarlyq óńirleri arasynda kóshbasshy orynyn saqtap otyr. Syrtqy naryqtarda óńir kásiporyndary óndirgen et, qus eti, jemis-jıdek, kókónis, sút ónimderi men sýsyndar eń joǵary suranysqa ıe.
İri óndirýshiler eksporttyq áleýetti damytýǵa eleýli úles qosýda. Olar Qytaıǵa, Saýd Arabıasyna jáne TMD elderine balmuzdaq, Reseı naryǵyna qyzanaq pen sýblımasıalanǵan ónimder, sondaı-aq sheteldik iri saýda jelilerine shyryndar, аlkogólsiz sýsyndar jáne shaı ónimderin jetkizedi.
«Jalpy, Almaty oblysynyń agroónerkásip kesheniniń ónimi 50-den astam memleketke eksporttalady. Ortalyq Azıa jáne TMD elderinen basqa, qazaqstandyq óndirýshiler óz ónimderin Germanıa, Polsha, Rýmynıa, Bolgarıa, Túrkıa, Birikken Arab Ámirlikteri, Iran, Irak jáne Pákistanǵa jetkizedi», — dedi vedomstvo ókilderi.
Óńirdiń mańyzdy syrtqy saýda seriktesteriniń biri Ózbekstan bolyp qala beredi. «Sońǵy úsh jylda osy elge eksport kólemi eki esege jýyq ósti — 110 mln dollardan 203 mln dollarǵa deıin. Ózbek naryǵynda un jáne sút ónimderi eń suranysqa ıe taýarlar bolyp otyr», — dep túsindirdi QR ASHM ókilderi.
Óńirde eksport kórsetkishteriniń turaqty ósýi óndiristik qýattardy keshendi jańǵyrtý, ınvestısıalar tartý, zamanaýı tehnologıalardy engizý jáne agroónerkásip keshenin memlekettik qoldaý sharalaryn júzege asyrýdyń arqasynda múmkin bolǵany atap ótiledi. Atqarylyp jatqan jumys jetkizý geografıasyn odan ári keńeıtýge jáne qazaqstandyq óndirýshiler óniminiń halyqaralyq naryqtardaǵy pozısıasyn nyǵaıtýǵa, Almaty oblysynyń eksporttyq áleýetin damytý úshin jańa múmkindikter ashýǵa yqpal etedi.