Almaty oblysynda óndirilgen ónim álemniń 61 eline jetkiziledi. Qazir óńirdegi 49 kásiporyn óz ónimin shetelge eksporttaıdy. Sońǵy úsh jylda jalpy eksport kólemi 1,1 mlrd AQSh dollaryna (shamamen 515 mlrd teńge) jetti. Bul týraly infohub.kz saıty habarlaıdy.
Kórshi memleketterden basqa, oblys kásiporyndary Túrkıa, Birikken Arab Ámirlikteri, Iran, Irak, Pákistan, Germanıa, Polsha, Rýmynıa jáne Bolgarıaǵa da taýar jóneltedi. Sońǵy úsh jylda alys shetelge eksport kólemi 2,1 ese ósip, 291,7 mln dollardy qurady.
Negizgi saýda seriktesi — Ózbekstan. Oǵan eksport kólemi úsh jylda 110 mln dollardan 203 mln dollarǵa deıin ósti. Eksporttyń negizgi taýarlary — un, sút ónimderi jáne farmasevtıkalyq buıymdar.
Óńirlik eksporttyń 60%-dan astamy aýyl sharýashylyǵy ónimderi men olardyń qaıta óńdelgen taýarlaryna tıesili. Sonymen qatar shetelge qurylys materıaldary, hımıa ónerkásibi ónimderi, farmasevtıka jáne temeki buıymdary jóneltiledi. Eń joǵary suranysqa et, qus eti, jemis-jıdek, kókónis, sút ónimderi men sýsyndar ıe. Almaty oblysy kókónis shyryndaryn eksporttaý boıynsha Qazaqstanda birinshi orynda.
Almaty oblysy kásipkerlik jáne ındýstrıalyq-ınnovasıalyq damý basqarmasynyń basshysy Aıbol Rahymbaevtyń aıtýynsha, óńir birtindep eldegi iri eksporttyq-logıstıkalyq ortalyqtardyń birine aınalýda. «Buǵan tamaq ónerkásibi, farmasevtıka jáne aýyl sharýashylyǵy ónimderin qaıta óńdeý kásiporyndarynyń óndiristik qýatyn arttyrý sebep boldy. Óńirdiń kóliktik-logıstıkalyq ınfraqurylymynyń — Qytaı-Eýropa halyqaralyq kólik dálizi, BAKAD, zamanaýı logıstıkalyq habtar men qoıma keshenderiniń damýy da mańyzdy ról atqarady», — dedi Rahymbaev.
Shin-Line kompanıasy ótken jyly Qytaı, Saýd Arabıasy jáne Táýelsiz Memleketter Dostastyǵy elderine rekordtyq 15 myń tonna balmuzdaq jetkizdi. Fruit Art jáne LST AGRO kásiporyndarynyń qyzanaqtary men sýblımasıalanǵan ónimderiniń 90%-ǵa jýyǵy Reseıdiń iri saýda jelilerine jiberiledi. RG Brands Kazakhstan kompanıasy shyryn, аlkogólsiz sýsyndar jáne shaı ónimderin jetkizýden jyl saıyn shamamen 60 mln dollar eksporttyq tabys alady.