Almaty oblysyndaǵy Panfılovo eldi mekeniniń turǵyndary úsh jyl boıy mańaıdaǵy mal soıý ornynan shyqqan shydamas ıiske shaǵymdanyp keledi. Sasyq ıisten olar terezeler men esikterdi asha almaıdy, keıbiri úıinen ketýge májbúr. Bul másele týraly infohub.kz habarlaıdy.
Jergilikti turǵyn Danıar Aıdarbekovtiń aıtýynsha, jyly mezgilde shirigen et pen maldyń ishek-qarnynyń ıisi shydamastaı bolady. «Bul másele eki-úsh jyldan beri sozylyp keledi. Jylymyq túsip, jaz kelgende jel soqsa boldy — bitti. Munda tunshyǵyp otyrmyz. Shirik ıisi. Maldyń ishki músheleri, terisi shirıdi. Bul — tezeń. Barlyǵy aralasyp, keledi», — dedi ol. Sharýanyń sózinshe, ol keıde otbasymen aýyldy tastap ketýge májbúr, sasyq ıisti jutpaý úshin.
Soıys sehy jergilikti bazar aýmaǵynda jumys isteıdi. Turǵyndardyń aıtýynsha, ıis birneshe shaqyrymǵa taraıdy. Olar sasyq ıistiń kózin anyqtamaq bolyp, maldyń ishek-qarny men qaldyqtary jaı ǵana edenge shashylyp jatqanyn kórgen.
Mal soıý ornynyń ıeleri jaǵymsyz ıistiń mundaı óndiriske tán ekenin túsindirdi. Kásiporyn 60 jyldan beri jumys istep, jergilikti turǵyndardy etpen qamtamasyz etedi. Buryn shaǵym túspegen, sebebi jaqyn mańda turǵyn úıler bolmaǵan. «Iis týraly aıtarym, keńes kezinde MTF aınalasynda sanıtarlyq aımaq bolǵan. Biraq qazir bul sanıtarlyq aımaq turǵyndar tarapynan saqtalmaı, olar jaqyndap ketti. Ózderińiz kórdińizder, qorshaýymyzǵa taıaý úıler turǵyzylǵan. Árıne, bul jerde óndiris, mal bar. Buny parfúmerıa fabrıkasy dep aıtýǵa bolmaıdy. Iis bolýy múmkin, biraq bul tabıǵı ıis», — dedi bazar ákimshisi Baqytjan Bekmuratov.
Kóptegen shaǵymdardan keıin mal soıý ornyna tekserý júrgizildi. Ieleri sanıtarlyq normalardy buzǵany anyqtaldy: mal qaldyqtary eki kúndeı shyǵarylmaǵan. Osy úshin olarǵa aıyppul salyndy. Buzýshylyqtar joıyldy, biraq ıis áli de seziledi. Panfılov aýyldyq okrýgi ákiminiń orynbasary Arsen Qurmanqazıev: «Biz 20-sy kúni sol jerge bardyq. Ákim, veterınarlyq ınspektor, basqarma bastyǵy, polısıa boldy. Baryp, tekserip, jeti kúnge nusqama berdik, joıý úshin. Sodan keıin aıyppul saldyq, dál veterınarlyq ınspeksıa saldy. Iistiń bolǵany úshin», — dedi.
Ieleri buzýshylyq qoqys polıgonyndaǵy órtke baılanysty bolǵanyn, qaldyqtardy ýaqytsha mal soıý ornynyń aýmaǵynda qaldyrǵanyn túsindirdi. Olar mundaı jaǵdaıdyń qaıtalanbaıtynyna ýáde berip, jaǵymsyz ıispen kúres sharalaryn ázirlegenderin málimdedi.