Almaty oblysynda naryqtyq quny 127 676 000 teńge bolatyn múlik keshenine qatysty azamattyq daý sot úkiminsiz sheshildi — taraptar medıatıvtik kelisimge keldi, dep habarlaıdy infohub.kz saıty.
Almaty oblysy sottarynyń resmı Telegram-arnasynda jazylǵandaı, İle aýdandyq soty talap qoıýshynyń jaýapkerge múlikti ıelený tártibi týraly aryzy boıynsha isti qarady.
İsti daıyndaý barysynda sot qatysýshylarǵa medıasıanyń artyqshylyqtaryn jáne daýdy kelissózder men ózara jeńildikter arqyly retteý múmkindigin túsindirdi.
Sot talqylaýyn jalǵastyrýdyń ornyna taraptar kelissóz jolyn tańdap, eki jaqqa da qolaıly sharttardy ózderi aıqyndady. Nátıjesinde ymyraǵa kelindi: múlikti satýdyń bastapqy baǵasy 110 mln teńge, eń tómengisi — 80 mln teńge, al birlesip satý merzimi 9 aı dep belgilendi.
Ár tarap áleýetti satyp alýshylardy óz betinshe izdeýge jáne qajet bolǵan jaǵdaıda rıeltorlyq agenttikterdi tartýǵa quqyly boldy. Osylaısha, daýǵa qatysýshylar tek daýly múliktiń taǵdyryn kelisip qana qoımaı, ony satý úderisine yqpal etý múmkindigin de saqtap qaldy.
Medıatıvtik kelisimdi bekitýge baılanysty talap qoıýshyǵa 638 380 teńge mólsherindegi memlekettik baj qaıtaryldy.
Sot uıǵarymy zańdy kúshine endi.