Áleýmettik jelilerde Almaty oblysynda sheteldik azamatsha polısıa qyzmetkerleri tarapynan zorlyq-zombylyqqa ushyrady dep aryzdanǵany týraly aqparat tarady. Jaǵdaıdy oblystyq Polısıa departamenti túsindirdi, dep habarlaıdy infohub.kz saıty.
Threads áleýmettik jelisindegi abv_novosti pablıgi Almaty oblysynda zorlyqqa ushyraǵanyn málimdegen sheteldik azamatsha týraly jazba jarıalady. «Qonaevta 28 jastaǵy sheteldik áıel jergilikti polısıa qyzmetkerleri ony toptasyp zorlady dep aryzdandy. Qyzdyń aıtýynsha, onyń aryzyn organdarda aıtqyzyp jazdyrǵan, keıin polıseıler onyń páterin baqylap, zattaı dáleldemelerdi alý úshin terezeniń toryn sheship alǵan. Qorqynyshtan úıden shyǵýǵa qorqady, dárigerlik kómekke muqtaj bolsa da, úıine jedel járdem men patrúldik kólik kelgen», — delingen habarlamada.
Jazbaǵa tirkelgen beınejazbada qyz ózinde zattaı dáleldeme — boljamdy zorlaýshynyń bıomaterıaly qalǵan ish kıim bar ekenin aıtady.
Jarıalanymǵa Almaty oblysy Polısıa departamenti jaýap berdi. «Osy fakti boıynsha polısıa qyzmetkerleri qylmystyq is qozǵady. Kúdiktiler ýaqytsha ustaý ızolátoryna qamaldy. Áıeldiń aryzy boıynsha oqıǵa Qonaev qalasynda bolǵan. Alǵashqy tergeý jáne jedel-izdestirý is-sharalary barysynda aryzda kórsetilgen eki er adam anyqtalyp, ustalyp, jetkizildi. Bolǵan oqıǵanyń barlyq dáıekteri men mán-jaıy muqıat tekserilip, tıisti quqyqtyq baǵasyn alady», — dedi polısıada.
Sondaı-aq qazirgi tańda qajetti tergeý jáne jedel-izdestirý is-sharalary júrgizilip jatqany atap ótildi. Tergeý Almaty oblysy PD Tergeý basqarmasyna tapsyryldy. Tergeý múddesi úshin ózge aqparat jarıa etilmeıdi.