Almaty oblysynda sot negizsiz baıytý isi boıynsha bitimgershilik kelisimdi bekitti — jaýapker aıyna 100 myń teńge tóleýge kelisti, dep habarlaıdy infohub.kz.
Balqash aýdandyq soty negizsiz baıytýdy óndirip alý týraly talap qoıýdy qarady. Anyqtalǵandaı, 2026 jylǵy 21-23 qańtar aralyǵynda belgisiz adamdar memlekettik organdar men bank qyzmetkerleri bolyp tanystyryp, aldaý jolymen talapkerdiń banktik shottarynan aqshasyn ıemdengen. Olar senimdi teris paıdalanyp, aqparattyq júıelerdi qoldana otyryp, onyń shottary men bank termınaldarynan aqshany ártúrli adamdarǵa, sonyń ishinde jaýapkerge aýdarǵan.
Sýdıa-medıatordyń kómegimen taraptar medıasıa arqyly daýdy rettedi. Taraptar aqparattyń tolyqtyǵy men durystyǵyn rastap, medıasıa tártibinde daýdy retteý týraly kelisimge qol qoıdy.
Kelisim sharttary boıynsha jaýapker talapkerge 3,8 mln teńge, onyń ishinde negizsiz baıytý úshin 3,5 mln teńge jáne sot shyǵyndary úshin 300 myń teńge tóleýge mindettendi. Tólem aıyna 100 myń teńgeden qolma-qol aqshamen ár aıdyń 15-i kúnine deıin, 2026 jylǵy 15 maýsymnan bastap 2029 jylǵy 15 shildege deıin 38 aı boıy júrgiziledi.
Eger kelisim belgilengen merzimde oryndalmasa, atqarý paraǵy talapkerdiń ótinishi boıynsha májbúrlep oryndalýǵa jatady. İs boıynsha is júrgizý toqtatyldy. Tólengen memlekettik baj salyǵy 34 980 teńge kóleminde talapkerge qaıtaryldy. Uıǵarym zańdy kúshine endi.