Almaty oblysy Qarasaı aýdanynyń ákimshilik quqyq buzýshylyqtar jónindegi mamandandyrylǵan aýdanaralyq soty áleýmettik jelilerde taraǵan rezonansty beınejazbanyń keıipkerlerine qatysty ákimshilik is boıynsha sheshim shyǵardy, dep habarlaıdy infohub.kz saıty.
İs materıaldaryna sáıkes, beınerolıktegi tulǵalar qoǵamdyq orynda júrip, aınalasyndaǵylarǵa ashyq túrde qurmetsizdik tanytyp, qoǵamdyq tártip pen azamattardyń tynyshtyǵyn buzatyn áreketter jasaǵan.
Beınejazba Qaznette tez taralyp, quqyq qorǵaý organdarynyń nazaryna ilikken. Sot otyrysynda is materıaldary men beınejazbany sarapshylar men sýdıa zerdelep, azamattardyń áreketterine tıisti quqyqtyq baǵa berdi.
Sot beınejazbaǵa qatysýshylardy Qazaqstan Respýblıkasynyń Ákimshilik quqyq buzýshylyq týraly kodeksiniń 434-babynyń 1-bóligi boıynsha usaq buzaqylyq jasaǵany úshin kináli dep tanydy.
«Sot qaýlysymen azamattar QR ÁQBtK-niń 434-babynyń 1-bóligi boıynsha kináli dep tanyldy. Olarǵa osy baptyń sanksıasynda kózdelgen eń joǵary jaza — 10 táýlik ákimshilik qamaý taǵaıyndaldy», — dedi Qarasaı aýdanynyń ákimshilik quqyq buzýshylyqtar jónindegi mamandandyrylǵan aýdanaralyq sotynyń baspasóz qyzmeti.
Sot qaýlysy ázirge zańdy kúshine enbedi jáne zańda belgilengen tártippen shaǵymdanýǵa bolady.