Almaty oblysynda jeke úıdiń aýlasyna kólik soǵylyp, onda otbasy týǵan kúndi toılap jatqan. Mereıger áıel aıaǵynan aıyryldy, dep habarlaıdy infohub.kz.
Týystarynyń aıtýynsha, olar dastarqan basynda otyryp, 40 jasqa tolý merekesin toılap jatqan. Kenetten joǵary jyldamdyqpen kele jatqan kólik qaqpany soǵyp, tike aýlaǵa kirip ketken. Soqqydan jınalǵandar ár jaqqa ushyp ketken. Eń aýyr jaraqatty týǵan kún ıesi áıel alǵan. Ol qan josa bolyp, aıaǵy byt-shyt bolǵan.
«Ol qatty qan joǵaltty, esin jıa almaı uzaq jatty. Bir táýlikten astam esin jıǵan joq. Kólikti kýáligi joq qyz júrgizgen. Onyń qasynda kámeletke tolmaǵan 14 jasar ul bala otyrǵan deıdi. Kólik ıesi týraly bireýler artqy orynda otyrdy dese, endi bireýler onyń joq ekenin aıtady», — dedi jábirlenýshiniń qaryndasy.
Mereıgerdi aýyr jaǵdaıda jetkizgen. Dárigerler sol aıaqty ampýtasıalaý týraly sheshim qabyldady. «Naýqastyń jaraqaty baltyrdyń joǵarǵy úshten bir bóligi deńgeıinde boldy. Tinderdiń tirshilikke qabileti joqtyń qasy, qan tamyrlary, nervter, bulshyqetter jáne súıek tinderi zaqymdanǵan. Qazirgi ýaqytta pasıenttiń jaǵdaıy salystyrmaly túrde qanaǵattanarlyq, qajetti em júrgizilýde», — dedi Almaty qalalyq №7 klınıkalyq aýrýhananyń polıtravma bóliminiń meńgerýshisi Ramazan Askerov.
Jábirlenýshiniń qaryndasy da jaraqat aldy — onyń alty qabyrǵasy synǵan.
Kúdikti áıel oqıǵa bolǵan soń birden ustalǵany habarlandy. Qazir polısıa barlyq mán-jaıdy anyqtap jatyr. «Aldyn ala anyqtalǵandaı, 24 jastaǵy áıel kólik júrgizý kezinde basqarýdy joǵaltyp, eki jaıaý júrginshini qaǵyp ketken. Kúdikti ýaqytsha ustaý ızolátoryna qamaldy. Osy fakti boıynsha Qarasaı aýdany polısıa basqarmasy sotqa deıingi tergeý júrgizip jatyr», — dedi Almaty oblysy Qarasaı aýdany polısıa basqarmasynyń bastyǵy Nusqabek Zaýlanbaev.
Týystarynyń aıtýynsha, áıel bir jyldan astam ýaqyt boıy EKO prosedýrasyna daıyndalyp, ana bolýdy armandaǵan. Endi bul josparlardy keıinge qaldyrýǵa týra keledi. Jaqyndary ádil tergeýdi talap etedi.