Almaty oblysynda jyldyq 5% mólsherlememen «Alataý» jeńildikti ıpotekalyq baǵdarlamasy iske qosyldy. Oǵan 18 ben 60 jas aralyǵyndaǵy jumys isteıtin qazaqstandyqtar qatysa alady, dep habarlaıdy infohub.kz saıty.
«Alataý» baǵdarlamasy turǵyn úı jaǵdaıyn jaqsartýǵa muqtaj oblys turǵyndaryna arnalǵan. Bıyl ony júzege asyrýǵa 3,2 mlrd teńge bólinip, 120-dan astam nesıe berý josparlanýda.
«Alataý» ıpotekasynyń sharttary: jyldyq 5% mólsherleme, bastapqy jarna 10%, nesıeniń eń joǵary somasy — 30 mln teńgege deıin. Mańyzdy shekteý: páterdi tek jańa ǵımarattan jáne tek Qonaev qalasynan satyp alýǵa bolady. Sondaı-aq, menshiginde turǵyn úıi joq azamattar ǵana qatysa alady.
Baǵdarlama belgili bir sala qyzmetkerlerine baǵyttalǵan: bilim berý, densaýlyq saqtaý, mádenıet, sport, áleýmettik sala, energetıka jáne komýnaldyq sharýashylyq, memlekettik qyzmet, sondaı-aq BAQ (bul sanat 2026 jyly qosylǵan).
Ótinimder Qonaev qalasyndaǵy «Shahnýr» bıznes-ortalyǵynda qabyldanady. Qabyldaý kestesi: dúısenbiden jumaǵa deıin 9:00-den 18:00-ge deıin, senbide 13:00-ge deıin. Aldymen qujattardy ákimdik tekseredi, sodan keıin oblystyq komısıa qaraıdy. Qatysýshylardy irikteý baldyq júıe boıynsha júrgiziledi: resmı neke — 2 bal; kámeletke tolmaǵan balalar — 2 bal, árbir kelesi balaǵa qosymsha 1 bal; eńbek ótili (keminde eki jyl) — 2 bal, árbir kelesi jylǵa 1 bal; memlekettik qyzmette nemese búdjettik salada jumys isteý — 5 bal; álem chempıony nemese Azıa oıyndarynyń chempıony ataǵy, onyń ishinde paralımpıadashylar — 7 bal.
Konkýrs jeńimpazdary «Otbasy bankke» joldama alady, onda tabys pen nesıe tarıhy tekseriledi. Eger tabys jetkiliksiz bolsa, eki kepilger tartýǵa bolady.
Eske sala keteıik, Qazaqstanda 2%-dan 5%-ǵa deıingi mólsherlememen ıpotekalyq baǵdarlamalar da bar, olarǵa turǵyn úı kezeginde turǵan áleýmettik osal azamattar qatysa alady.