Алматыда 61 жастағы жергілікті тұрғынның өлтірілуі тергелуде. Оқиғаның мән-жайы бейнебақылау камераларының жазбасының арқасында белгілі болды. Кадрларда ер адамның басына пакет кигізіліп, иығына асып, подъезден шығарылып жатқаны көрінеді. Шошырлық мән-жайды марқұмның көршілері айтып берді, деп хабарлайды infohub.kz сайты.

Бұған дейін әлеуметтік желілерде екі жас жігіттің подъезге кіріп, бірдеңе талқылап жатқаны түсірілген бейнежазба тараған. Кейінірек олардың бірі басына пакет кигізілген ер адамды иығына асып шығарады. Бүгін Алматы полициясы 61 жастағы тұрғынның өлтірілуі бойынша төрт адам ұсталғанын мәлімдеді.

Өлтірілген адамның көршілері телеарнаға шошырлық бейнежазбаның қалай ашық қолжетімділікке шыққанын айтып берді. Тұрғындардың айтуынша, олардың бірі пошта жәшігінің кілтін жоғалтып, бейнебақылау камераларының жазбасын тексеруге бел буды. Кадрларда көргені оны шошытты. Кейін жазба әлеуметтік желілерге тарап, қоғамда кең резонанс тудырды.

Көршілердің айтуынша, бәрі 30 қыркүйекте таңертең ерте болған. Олардың сөзінше, бұған дейін бейтаныс адамдар подъезді қарап шыққан, кейін пошта жәшігінің кілттері жоғалып кеткен. Кейінірек тұрғындар жоғалған ер адамның пәтері сатылып кеткенін білді.

«Адам тыныш өмір сүрді, ешкімге тиіспеді. Біз оны жай ғана жоғалтып алдық. Ол күн сайын шығып, кіріп, дүкенге барып жүретін. Ал енді адам жоқ. Жаңа ғана сөйлескенбіз. Сосын сенбіде заттарын шығарып жатқанын көрдік. Кейін видеоны қарасақ, оны, кешіріңіз, қойды иығына асып шығарғандай шығарыпты. Өлтіріпті», — деді көршісі Надежда Сычева.

Көршілердің айтуынша, ер адамның аты Сергей еді. Ол бұл үйде көптен бері тұрған, оқшау ұстап, ешкіммен дерлік араласпаған, үйден негізінен сауда жасауға шығатын.

«Видеоны қарай бастадық, 29-ы күні олар осында пошта жәшігіне (ақтарып — ред. ескертпесі) кіріп, дәл бесінші пәтердің жәшігіне қарағанын көрдік. Ал 30-ы күні оны иығынан асып шығарып жатқанын көрдік. Сонда біз дабыл көтердік. Ол бізге мүлдем кедергі жасамайтын», — деді көршісі Ирина Лимарева.

Әзірге көптеген сұрақ жауапсыз қалып отыр. Істі ең тәжірибелі қызметкерлері кірген Ішкі істер министрлігінің арнайы тергеу-жедел тобы тергеуде. Іс министрліктің ерекше бақылауында.