Sońǵy segiz jylda Almatyda qaterli isikten bes jyldyq ómir súrý kórsetkishi 46%-dan 75%-ǵa ósti. Bul jetistikti ozyq tehnologıalardy, sonyń ishinde qalalyq onkoortalyqtaǵy robottyq hırýrgıalyq júıeni engizýmen baılanystyrady. Emdeýdiń jańa ádisterimen Almaty onkoortalyǵyna barǵan Densaýlyq saqtaý mınıstri Aqmaral Alnazarova tanysty, dep habarlaıdy infohub.kz saıty.
Densaýlyq saqtaý mınıstrliginiń basshysyna robottyq hırýrgıalyq júıe dástúrli úlken tilikterdiń ornyna shaǵyn tesikter arqyly kúrdeli az ınvazıvti otalar jasaýǵa múmkindik beretini aıtyldy.
Onkologtardyń aıtýynsha, qurylǵynyń joǵary dáldigi iri qan tamyrlarynyń zaqymdalý qaýpin azaıtyp, qan quıý qajettiligin tómendetedi. Robottyq aralasýlar kezinde asqynýlardyń, qabyný prosesteriniń jáne ınfeksıalardyń yqtımaldyǵy da azaıady.
Mundaı otalardan keıin naýqastar áldeqaıda az aýyrsyný sezinedi, stasıonarda azyraq ýaqyt jatady jáne ádettegi ómir saltyna tezirek oralady.
Sonymen qatar robot hırýrgke operasıa alańyn úlkeıtilgen úsh ólshemdi beınede kórýge múmkindik beredi, sonyń arqasynda eń usaq júıkeler men qan tamyrlary anyq kórinedi. Júıe qozǵalystyń joǵary dáldigin qamtamasyz etip, hırýrgtiń qolynyń dirildeýin tolyq óteıdi.
Qazirgi tańda qalada 38 myńnan astam onkologıalyq naýqas esepte tur, jyl saıyn 27 myńnan astam adam medısınalyq kómek alady. Sońǵy segiz jylda kórsetiletin emdeý qyzmetiniń kólemi eki jarym ese óskeni atap ótildi.
Buǵan deıin «Kýrsıv» Almatyda jańa zamanaýı onkoortalyq salynatynyn jazǵan bolatyn. Joba memlekettik saraptamadan ótti. Ony robototehnıkasy bar operasıalyq blokpen, molekýlalyq-genetıkalyq zerthanamen jáne preparattardy daıyndaıtyn avtomatty júıemen jabdyqtaýǵa ýáde berildi.