Almatydaǵy Masǵut Aıqymbaev atyndaǵy asa qaýipti ınfeksıalar ulttyq ǵylymı ortalyǵynda 21 qyrkúıekte bolǵan órt tóńiregindegi manıpýlásıalyq habarlamalardyń taraýy osy naqty oqıǵany Reseıde oba boldy degen qaýesetpen baılanystyrý áreketimen ushtasyp jatyr, dep habarlaıdy infohub.kz saıty.
NUR.KZ agenttigi Dezınformasıaǵa qarsy kúres ortalyǵyna silteme jasap habarlaýynsha, tıisti manıpýlásıalyq materıaldar sońǵy kúnderi jelide taraı bastaǵan.
«Sońǵy kúnderi órttiń naqty faktisi tóńireginde keıbir akkaýnttar bolǵan oqıǵany buǵan deıin reseılik bılik resmı túrde joqqa shyǵarǵan Reseıdegi oba jaǵdaıy týraly qaýesetpen baılanystyrýǵa tyrysyp jatyr. Sonymen qatar asa qaýipti ınfeksıalar ulttyq ǵylymı ortalyǵynda mamandandyrylǵan zerthanalardyń bolýy eki oqıǵa arasynda jalǵan baılanys jasap, qosymsha úreı týdyrý úshin paıdalanylyp otyr», — delingen Dezınformasıaǵa qarsy kúres ortalyǵynyń Telegram-arnasynda jarıalanǵan habarlamasynda.
Dezınformasıaǵa qarsy kúres ortalyǵy paıdalanýshylardy manıpýlásıaǵa berilmeýge jáne taralyp jatqan aqparatty resmı derekkózderden tekserýge shaqyrady.
Eske salaıyq, 21 qyrkúıekte Almatydaǵy ǵylymı ortalyqtyń eki qabatty ákimshilik ǵımaratynyń ekinshi qabatynda órt shyqqany belgili boldy. TJD dereginshe, turmystyq tehnıka men zattar janǵan.
Densaýlyq saqtaý mınıstrligi keıinirek órt saldarynan mamandandyrylǵan zerthanalardyń zardap shekpegenin naqtylady. Zerthanalyq jumystar júrgiziletin bólmelerdi ot sharpymaǵan, olardyń germetıkalyǵy buzylmaǵan. Infeksıalyq aýrýlardyń taralý qaýpi men halyqqa qaýip joq.
Al jaqynda BAQ Reseıdiń Irkýtsk oblysynda obaǵa qarsy ınstıtýt qyzmetkeriniń oba kúdigimen kóz jumǵanyn habarlady. Keıin Rospotrebnadzor ol anyqtalmaǵan etıologıalyq pnevmonıadan qaıtys bolǵanyn málimdedi.