Almatyda aýyr sozylmaly jáne emdelmeıtin aýrýlary bar balalarǵa arnalǵan alǵashqy pallıatıvtik kómek bólimshesi jumysyn bastady. Munda kishkentaı pasıentterge aýrý belgilerin jeńýge kómektesip, olardyń otbasylaryna medısınalyq jáne psıhologıalyq qoldaý kórsetiledi, dep habarlaıdy infohub.kz saıty.
Bólimshe Almatydaǵy klınıkalyq aýrýhanalardyń biriniń bazasynda ashylyp, 18 jasqa deıingi balalarǵa arnalǵan. Alǵashqy pasıentter jaqyn kúnderi qabyldanady.
Pallıatıvtik kómek — emdelmeıtin aýrýlary bar pasıentterdiń ómir sapasyn jaqsartýǵa baǵyttalǵan medısınalyq jáne psıhologıalyq sharalar kesheni. Onyń maqsaty — emdeý emes, aýyrsynýdy jeńildetý jáne otbasyna qoldaý kórsetý. Aıta ketý kerek, pallıatıvtik kómek negizgi emdi joqqa shyǵarmaıdy, kerisinshe onymen úılese alady.
Jańa bólimshede dárigerler balanyń aýrý belgilerin jeńildetýge basa nazar aýdarady. Mamandardyń keńesteri men psıhologıalyq qoldaý qarastyrylǵan. Balalarmen pedıatrlar, reanımatologtar, onkogematologtar, reabılıtologtar, psıhologtar jáne basqa da mamandar kiretin mýltıdısıplınarlyq top jumys isteıdi.
Ata-analarǵa erekshe kóńil bólinedi: olar úshin úı jaǵdaıyna barynsha jaqyn jaǵdaı jasalǵan, osylaısha olar balanyń qasynda bola alady jáne qajetti qoldaý alady. Buǵan deıin Kursiv Health Qazaqstandaǵy pallıatıvtik kómek jaǵdaıyn Qazaqstandyq pallıatıvtik kómek qaýymdastyǵynyń prezıdenti, «Qaterli isikke birge qarsy» qorynyń dırektory jáne QR Densaýlyq saqtaý mınıstrliginiń pallıatıvtik kómek jónindegi bas shtattan tys mamany Gúlnara Kýnırovamen talqylaǵan bolatyn.