69 jastaǵy almatylyq Svetlana Sýhodolskaıa ózin UQK qyzmetkerimin dep tanystyrǵan telefon alaıaqtarymen sóılesken soń eki páterinen aıyryldy. Áıel ár páterin 25 mıllıon teńgeden satyp, aqshany kýrerlerge berip qoıǵan. Endi ol jarty ǵasyrdan astam turǵan úıinen ketýge májbúr, dep habarlaıdy infohub.kz saıty.

Oqıǵa 2025 jyldyń mamyr aıynda boldy. Belgisiz bireý zeınetkerge qońyraý shalyp, onyń elektrondy sıfrlyq qoltańbasy buzylǵanyn aıtqan. Alaıaqtarǵa senip, Sýhodolskaıa satý-satyp alý sharttaryn rásimdep, aqshany kýrerlerge tapsyrǵan.

«Bul páterdi ákem alǵan, ol Uly Otan soǵysynyń I top múgedegi edi. Kózi kórmeıtin. 1972 jyly osy páterdi aldyq. Ákem birden qyzyl aǵashtan jasalǵan osy jıhazdy satyp aldy. Bul cheh garnıtýry, qyzyl aǵashtan jasalǵan», — dep áńgimeledi zardap shekken áıel.

Tergeý bir jylǵa sozyldy, biraq bas alaıaqty anyqtaý múmkin bolmady. Mámileni joıý áreketteri nátıjesiz bolyp, sot áıeldi páterden shyǵarý týraly sheshim qabyldady. «Mine, osy páterde 53 jyl turdym... Renjigim kelmedi. Bolmady. Zattarymdy jınadym, ar-ujdanym taza, kiltterdi tapsyrdym. Mine, osylaı meniń qarttyǵym aıaqtalyp jatyr, keshirińiz. Ári qaraı ne bolady, shynyn aıtsam, bilmeımin», — dedi ol.

Polısıa zeınetkerden aqsha alǵan eki Qyrǵyzstan azamatyn ustady. Sot olardy 5,5 jylǵa bas bostandyǵynan aıyryp, shyǵyndy óteýge mindettedi. Alaıda Sýhodolskaıanyń aıtýynsha, tólem alý ekitalaı: «Meni eń qatty renjitkeni – aqshamdy alyp, alaıaqtarǵa aparǵan kýrerlerge tólem jasaýdy buıyrdy. Olardyń ata-analary balalarynan bas tartqan, qaryzdaryn ótemeıdi. Al Qazaqstanda olar jumys isteı almaıdy, sebebi sheteldikter».

Qazir zeınetker qaıda turatynyn bilmeıdi. Uly men nemeresi shetelde. Tanystary qarttar úıin usynady, biraq ol barǵysy kelmeıdi. «Shańyraq» áleýmettik qyzmet kórsetý ortalyǵynyń áleýmettik jumys jónindegi dırektor orynbasary Symbat Nabıeva túsindirgendeı: «Jasy boıynsha zeınetkerler turýǵa quqyly, olar tirkelgen jeri boıynsha bekitiledi. Halyqty jumyspen qamtý jáne áleýmettik baǵdarlamalar bólimine júginedi. Onda qujattar tizimin alyp, tapsyrady. Tirkelgen jeri boıynsha HQKO-ǵa ótinish jazady».

Svetlana Sýhodolskaıa alaıaqtyq sqemasyn uıymdastyrýshylar tabylyp, jazalansa dep úmittenedi.