Алматыда Hyundai Elantra көлігін кәдімгідей тексеру синтетикалық есірткі өндіретін жерасты зертханасының ашылуына әкелді. infohub.kz сайтының хабарлауынша, таңғы жетілер шамасында Әуезов ауданының полицейлері осы көлікті тоқтатып, салонын қарау кезінде темекі қорабынан мефедрон деп болжанған зат салынған пакет табылған.
Кейінгі жедел-тергеу іс-шаралары барысында тәртіп сақшылары ұсталған адамның Наурызбай ауданында тұратын мекенжайын анықтады. Пәтерді қарау кезінде онда синтетикалық есірткі жасайтын зертхана деп болжанған орын табылды.
Оқиға орнынан зертханалық жабдық, электронды таразы, шыны колбалар, химиялық заттар және сұйықтық құйылған ыдыстар алынды. Табылған заттардың ішінде салмағы бір келіден асатын, мефедрон деп болжанған ұнтақ тәрізді зат та болды.
Алдын ала деректерге сәйкес, ер адам Telegram арқылы куратордың нұсқауларын орындап, осы қызметпен айналысқан. Алынған заттар мен бұйымдар сараптамаға жіберілді. Осы факті бойынша қылмыстық іс қозғалып, күдікті қамауға алынды.