Almaty polısıa departamenti beıtanys áıelge shabýyl jasaýy múmkin er adamdy izdestirýde, dep habarlaıdy infohub.kz saıty.
Egovpress Instagram paraqshasynda jarıalanǵan beınejazbada er adam áıeldi ustap alyp, onymen birge edenge qulaǵany, keıin kýágerlerdiń áıeldi qorǵap qalǵany kórinedi.
«Almaty polıseıleri beıtanys áıelge shabýyl jasaǵan belgisiz er adamdy izdestirýde. Zardap shekken áıel osy adamdy tanıtyndardan onyń derekterin polısıaǵa habarlaýdy suraıdy», — delingen beınejazba sıpattamasynda.
NUR.KZ tilshisi Almaty polısıa departamentiniń baspasóz qyzmetine saýal joldady.
«Áıelge fızıkalyq kúsh qoldanylǵany túsirilgen beınejazba boıynsha Áýezov aýdany polısıa basqarmasy tergeý júrgizýde. Áıeldiń jeke basy anyqtaldy, qazir ol polısıada jáne jaýap berýde. Buǵan deıin ol osy derek boıynsha polısıaǵa aryzdanbaǵan. Qazirgi tańda beınejazbada túsirilgen er adamnyń ornalasqan jeri anyqtalýda», — dep jaýap berdi departamentte.
Polısıa er adamnyń áreketine qaǵıdatty quqyqtyq baǵa beriletinin jáne ol zańda belgilengen tártippen jaýapkershilikke tartylatynyn ýáde etti.