Almatyda túngi ýaqytta jol qozǵalysy erejelerin buzýshylyqtardyń aldyn alý kúsheıtildi — reıdter barysynda 550-ge jýyq buzýshylyq anyqtaldy, dep habarlaıdy infohub.kz saıty.
NUR.KZ agenttigi İshki ister mınıstrligine silteme jasap habarlaǵandaı, tártip saqshylary motokólikke — motosıkl men mopedterge, sondaı-aq túngi ýaqytta jıi tirkeletin buzýshylyqtarǵa erekshe nazar aýdardy.
Tekserý júrgizý úshin jol qaýipsizdigi qyzmetiniń, patrúldik polısıanyń jáne aýdandyq polısıa bólimsheleriniń qyzmetkerlerinen 10 mobıldi top quryldy.
Reıdtik is-sharalar barysynda barlyǵy 544 jol qozǵalysy erejesin buzýshylyq anyqtaldy. Anyqtalǵan faktilerdiń ishinde — kólikti mas kúıinde basqarýdyń 18 jaǵdaıy. Manevrleý erejelerin buzǵany úshin 46 júrgizýshi jaýapkershilikke tartyldy, 7 jaǵdaıda apattyq jaǵdaı týǵyzý tirkeldi.
Motokólikke erekshe nazar aýdaryldy: 13 moped pen 5 motosıkl arnaıy aıyppul turaǵyna qoıyldy. Sonymen qatar, kóshelerden kıksherıng kompanıalarynyń 58 elektrosamokaty alyndy.
«Jol qozǵalysynyń qaýipsizdigi táýlik ýaqytyna táýeldi emes. Ásirese, túngi ýaqytta jekelegen júrgizýshiler jyldamdyqty asyryp, qaýipti manevrler jasap, kólikti mas kúıinde basqaryp nemese belgilengen talaptardy buza otyryp paıdalanýǵa jol beretinin eskerý qajet. Sondyqtan biz dál túngi saǵattarda baqylaýdy kúsheıttik. Birinshi kezekte bizdiń mindetimiz — joldaǵy qaýipti minez-qulyqtyń aldyn alý jáne JKO-ǵa jol bermeý», — dedi Almaty qalasy PD ÁQB basqarmasynyń bastyǵy Abdınýr Tasybaev.