Kane Ýesttiń Almatydaǵy konsertine birneshe kún qalǵanda qala polısıasy bılet satýǵa baılanysty birqatar buzýshylyqtardy anyqtady. Qoǵamdyq qaýipsizdik basqarmasynyń bastyǵy Tımýr Noǵaıbaev aımaqtyq komýnıkasıalar qyzmetinde ótken brıfıńte tártip saqshylary áleýmettik jelilerdi belsendi baqylap, onda bıletterdi jeńildikpen satý týraly habarlandyrýlardy taýyp jatqanyn aıtty. Onyń aıtýynsha, mundaı adamdar anyqtalyp, profılaktıkalyq áńgime júrgizý úshin polısıa bólimshelerine jetkizilgen. Bul jaǵdaılarda alaıaqtyq áreketter anyqtalmaǵan, alaıda bılet satyp alyp, qandaı da bir sebeppen is-sharaǵa bara almaǵan azamattar olardy arzanyraq baǵamen qaıta satqan jaǵdaılar bolǵan. Sondaı-aq bıletsiz adamdardy ótkizý qyzmetin usyný áreketteriniń joly kesilip, tıisti jazbalar joıylǵan.
Noǵaıbaev keıbir buzýshylardyń jaýapkershilikke tartylǵanyn qosymsha aıtty. «Ádeıi jalǵan aqparat taratqany úshin jaýapkershilikke tartý faktileri boldy, aıyppul salyndy. Sondaı-aq zańsyz kásipkerlik qyzmet úshin ákimshilik is qozǵaldy, ıaǵnı adam ruqsat qujattary joq jáne kásipker bolmaı turyp, bılet satý qyzmetin usynady. İs materıaldaryn sotqa jiberip jatyrmyz», — dep túsindirdi spıker.
Osyǵan baılanysty Almaty polısıasy Kane Ýest jankúıerlerine bılet satyp alý kezinde alaıaqtardyń qurbany bolmaý jóninde usynystar jasady. Eske salaıyq, 17 shildede Kane Ýesttiń Almatydaǵy konserti týraly aqparat paıda boldy. Aldymen bul týraly onyń menedjeri Djozef Karre habarlady, keıin Almaty ákimdigi konserttiń 14 tamyzda saǵat 21:00-de Ortalyq stadıonda ótetinin rastady. Buǵan deıin polısıa jelide alaıaqtardyń osy is-sharaǵa joq bıletterdi satyp jatqany týraly da habarlaǵan bolatyn... dep habarlaıdy infohub.kz.