Almatyda ǵımaratty buzý jumystarymen aınalysqan jumysshy men jergilikti turǵyn arasynda janjal shyqty. Aýyzsha daý-damaı pyshaq urýmen ulasty, dep habarlaıdy infohub.kz.
Almaty polısıa departamentiniń málimetinshe, Bostandyq aýdanynda densaýlyqqa aýyr zıan keltirgen kúdikti ustaldy.
"Tótenshe qyzmetter púltine pyshaq jaraqaty týraly habarlama túsken. Oqıǵa ornyna kelgen dárigerler keýde tusynan jaralanǵan jas jigitti aýrýhanaǵa jatqyzdy. Al "Býran-405" patrúldik ekıpajy izin sýytpaı, kúdiktini ustady. Aldyn ala aqparat boıynsha, er adamdar arasynda buryn da janjal bolǵan. Birneshe kúnnen keıin aýyzsha daý qaıta tutanyp, sýyq qarý qoldanýmen aıaqtaldy", — delingen habarlamada.
Kúdiktiniń eski ǵımaratty buzý brıgadasynda jumys istegeni, al jábirlenýshiniń mańaıdaǵy úılerdiń biriniń turǵyny ekeni anyqtaldy. Oqıǵanyń mán-jaıy men sebepteri anyqtalýda.
"Densaýlyqqa aýyr zıan keltirý faktisi boıynsha qylmystyq is qozǵaldy. Kúdikti ýaqytsha ustaý ızolátoryna qamaldy. Polıseıler tergeý sharalaryn júrgizýde, onyń ishinde qylmys quralynyń ornalasqan jerin anyqtaý jumystary júrip jatyr", — dep naqtylady PD.