Almaty qalasynyń Memlekettik múlik jáne jekeshelendirý departamenti Qaırat Satybaldyulyna tıesili bolǵan burynǵy qonaqúı ǵımaratyn satýǵa shyǵara almady. 25 qyrkúıekke belgilengen elektrondyq aýksıon ótpedi dep tanyldy, dep habarlaıdy infohub.kz saıty.
Nysannyń saýda-sattyqqa qoıylǵany 9 qyrkúıekte belgili boldy. Almaly aýdanyndaǵy Dosmuhamedov kóshesi, 115 mekenjaıynda ornalasqan qonaqúı kesheni 12 759 410 000 teńge bastapqy baǵamen usynyldy. Aýksıon 25 qyrkúıekte saǵat 10:00-de bastalýy tıis edi, bul rette jalǵyz qatysýshyǵa satýǵa jol berildi.
Alaıda belgilengen kúni elektrondyq saýda portalynda lottyń mártebesi jańartyldy. «Ótpedi, elektrondyq aýksıon bastalǵan kezde aýksıon zalynda satý nysany boıynsha tirkelgen aýksıon qatysýshylary bolmady», — delingen jarıalanǵan mártebede.
Memlekettik múlik jáne jekeshelendirý departamenti buǵan deıin 2023 jyldyń tamyzynda qonaqúı syıǵa tartý shartynyń negizinde memleket kirisine berilgenin túsindirgen. Sol jyldyń qyrkúıeginde nysan Sot ákimshiligi departamentiniń balansyna ótti.
Sonymen qatar ınternette ǵımaratty buzý týraly aqparat taraı bastady. Alaıda qala ákimdigi NUR.KZ tilshisiniń suraýyna jaýap bere otyryp, burynǵy qonaqúıdi buzý jumystary júrgizilmeıtinin málimdedi.
Budan bólek, joba aıaqtalǵan soń ǵımaratty jer ýchaskesimen birge «Almaty qalasynyń sıfrlandyrý basqarmasy» komýnaldyq memlekettik mekemesine berý josparlanyp otyrǵany habarlandy. «Bolashaqta nysan sıfrlandyrý jáne jasandy ıntellektti damytý salasyndaǵy memlekettik baǵdarlamalardy iske asyrý, sondaı-aq IT, AI, kreatıvti ındýstrıalar jáne basqa da sabaqtas baǵyttarda jumys isteıtin rezıdentterdi ornalastyrý úshin paıdalanylady», — delingen ákimdiktiń jaýabynda.
Qaırat Satybaldyulynyń isine keletin bolsaq, 2022 jyldyń qyrkúıeginde sot ony urlyq týraly basqa is boıynsha kináli dep tanyp, alty jylǵa bas bostandyǵynan aıyryp, jazasyn ortasha qaýipsizdik mekemesinde óteýge taǵaıyndady. Keıin oǵan shartty túrde merziminen buryn bosatýdan bas tartyldy.
Satybaldyulynyń isi boıynsha jańa sot prosesi Astanada 2024 jyldyń 1 sáýirinde bastaldy. Otyrysta aıyptalýshynyń Reseıde, Birikken Arab Ámirlikterinde, Fransıada jáne Qazaqstandaǵy múlki týraly aıtyldy.
Keıin Satybaldyulyna memleketke jyljymaıtyn múlik pen lúks avtomobılderdi qaıtarýǵa ýaqyt berilgeni belgili boldy. Prokýror Nurmahanov Satybaldyulynyń tarapy qylmystyq aktıvterdi memleketke qaıtarýǵa keliskenin habarlaǵan.
Sybaılas jemqorlyqqa qarsy is-qımyl agenttigi Qaırat Satybaldyulynyń isi boıynsha taǵy 50 mlrd teńgeni qaıtarý josparlanyp otyrǵanyn málimdegen. 2024 jyldyń tamyzynda Antıkorda Qaırat Satybaldyulynyń memleketke naqty neni qaıtarǵany aıtyldy. Keıin Bas prokýratýra Satybaldyulyna taǵy 50 mlrd teńge somasyndaǵy múlik memleketke qaıtarylatynyn habarlady.