Almatyda Qala kúniniń merekesi Astana alańynda sharyqtaý shegine jetti. Munda aýqymdy Almaty Vibes mýzykalyq festıvali men mýltımedıalyq 3D Mapping Show ótti, dep habarlaıdy infohub.kz saıty.
Konserttik baǵdarlamaǵa tanymal qazaqstandyq ártister qatysty: Maqpal Júnisova, Mıras Júginisov, KALIFARNIYA, ALPHA, Aıdana Medenova, Jandos Qarjaýbaı, Tóreǵalı Tóreáli, «Alash uly» toby jáne basqa da oryndaýshylar.
Astana alańyna merekeni birge atap ótý úshin birneshe myń kórermen jınaldy. Qonaqtar ártistermen birge án salyp, bı bılep, qazaqstandyq juldyzdardyń ónerin jyly qarsy aldy. Kórermenderge Almatyǵa, onyń atmosferasyna jáne súıikti oryndaryna arnalǵan ánder erekshe áser etti.
Keshtiń eń jarqyn oqıǵalarynyń biri – Almatynyń damý tarıhyn, tanymal sáýlet nysandaryn jáne zamanaýı sıfrlyq tehnologıalardy biriktirgen mýltımedıalyq 3D Mapping Show boldy.
Astana alańyna qaraǵan QBTÝ ǵımaratynyń qasbeti aýqymdy ekranǵa aınaldy. Jaryq pen vızýaldyq effektilerdiń arqasynda onda qala tarıhy ashylyp, kórermender tanys Almatyny erekshe sıfrlyq formatta kóre aldy.
Merekelik baǵdarlama týraly áserimen festıválge 10 jasar qyzy Medınamen birge kelgen qala turǵyny Aıgerim Mahmetova bólisti.
«Búgin alańdarda ásem saltanattar ótip jatyr, al festıváldegi qazaqstandyq juldyzdardyń óneri sonsha qýanysh pen jaǵymdy emosıa syılaıdy. Mýltımedıalyq shoý bizdiń Almatynyń tarıhy men sáýletin óte áserli ári tyń túrde kórsetti. Barlyq almatylyqtarǵa osyndaı atmosferany árdaıym saqtaýdy – bir-birin qoldap, súıikti qalamyzdy birge damytýdy tileımin», – dedi Aıgerim Mahmetova.
Eske salaıyq, Almatyda dástúrli túrde qyrkúıektiń úshinshi jeksenbisinde atap ótiletin Qala kúnine oraı merekelik is-sharalar ótip jatyr. Qalanyń túrli alańdarynda megapolıs turǵyndary men qonaqtary úshin konsertter, festıválder, qoıylymdar jáne basqa da is-sharalar uıymdastyrylýda.