Almatyda «Inovasıalyq tehnologıalar parki» arnaıy ekonomıkalyq aımaǵynyń alańynda jasandy ıntellekt tehnologıalaryn qoldanatyn robottar óndirisi iske qosylady. NERO Group kompanıasy qytaılyq UBTECH Robotics-pen birlesip osyndaı ónim shyǵarýdy jergiliktendiredi. Jobaǵa salynatyn jalpy ınvestısıa kólemi 440 mıllıon dollarǵa baǵalanyp otyr, dep habarlaıdy infohub.kz saıty.
Bastamanyń egjeı-tegjeıin NERO Group basshysy Erlan Nabıev «Qazaqstan – Qytaı» ınvestısıalyq forýmynda aıtyp berdi. Qytaıdaǵy robot óndirýshilerdiń biri — UBTECH Robotics kompanıasymen kelisimge áli shildede qol qoıylǵan. Jarıalanǵan somanyń 340 mıllıon dollary UBTECH-tiń gýmanoıdty robottar óndirý tehnologıasyn transfertteýge tıesili, al 100 mıllıon dollary NERO Group-tyń jeke ınvestısıasy.
«Bul — tek óndiristik bólikti jergiliktendirý emes. Bul — R&D (zertteý jáne ázirleý), zertteýler, baǵdarlamalaý, kóptegen jumys ornyn qurý, sondaı-aq, árıne, óndiristik alańdar. Aıta keteıin, «ITP» AEA aýmaǵynda osy qajettilikterge arnalǵan 25 myń sharshy metrlik úlken ortalyq salyp jatyrmyz», – dedi Erlan Nabıev.
Kompanıa basshysynyń aıtýynsha, basty nazar oıyn-saýyq baǵytyna emes, robottardy bilim berý, qyzmet kórsetý, óndiris, logıstıka jáne áleýmettik qoldaý salalarynda qoldanýǵa aýdarylady.
NERO Group robototehnıkany bilim berýge engizýge erekshe kóńil bólmek. Kompanıa basshysy oqýshylar robottardy qurastyryp, olardy baǵdarlamalap, ózderiniń qazaqstandyq robottaryn jasaı bilýi kerektigin atap ótti. Memlekettik baǵdarlama aıasynda kompanıa mektepterge osyǵan qajetti qural-jabdyqty tegin beredi.
«Almaty qalasy ákimdiginiń tapsyrmasy boıynsha osy jyldyń sońyna deıin qalanyń 30-ǵa jýyq mektebin robottarmen qamtamasyz etýdi maqsat etip otyrmyz. Kelesi jyly, 2028 jylǵa qaraı, qalǵan 200-den astam mektepti de qamtımyz. 50 myń bilim berý robotokeshenin shyǵarý josparlanyp otyr, ıaǵnı bul — robototehnıka jınaqtary. Servıstik jáne gýmanoıdty robottarǵa keletin bolsaq, jergiliktendirýdi kelesi jyldyń, 2027 jyldyń ekinshi toqsanynan bastaımyz. Óndiristik qýaty 1 myń robot deńgeıinde jarıalandy», – dedi NERO Group basshysy.
Buǵan deıin Almatyda gýmanoıdty jáne bilim berý robottaryn shyǵaratyn zaýyt salynatyny habarlanǵan. Ol álemdegi robototehnıka salasynyń kóshbasshylarynyń biri — UBTECH Robotics kompanıasynyń sheteldegi alǵashqy óndiristik kásiporny bolady.