Almaty qalasynyń sanıtarlyq-epıdemıologıalyq baqylaý basqarmasy áleýmettik jelilerde taraǵan, qala turǵyndaryn «qulatatyn» belgisiz vırýs týraly jazbalarǵa jaýap berdi, dep habarlaıdy infohub.kz saıty.
Óńirlik komýnıkasıalar qyzmetinde ótken brıfıńte basqarma basshysynyń orynbasary Gaýhar Katkenova aıtqandaı, zerthanalyq monıtorıń nátıjeleri boıynsha Almatyda qazir rınovırýs, paragrıpp, RS-vırýsy jáne maýsymdyq koronavırýs aınalymda júr.
«Basqa jańa, beımálim jáne buryn kezdespegen vırýstar joq. Jyl boıy taldaý alyp, zerthanalyq zertteý júrgizetin jáne qazirgi ýaqytta qandaı vırýstar aınalymda júrgenin anyqtaıtyn segiz ortalyq bar. Zerthanalyq monıtorıń nátıjelerine sáıkes, men aıtqan vırýstar anyqtaldy», — dedi Katkenova.
Sonymen qatar, ol búginde almatylyqtar tumaýǵa qarsy ekpe ala alatynyn atap ótti. «Grıppol» preparaty jergilikti búdjet qarajaty esebinen qaýip tobyndaǵy azamattar úshin 250 myń doza kóleminde satyp alynǵan, al qalǵan azamattar aqyly túrde ekpe ala alady.
Gaýhar Katkenova Almatyda tósek-oryn qory men rezervtik qýat jetkilikti ekenin, bul barlyq qajetti pasıentterdi, sonyń ishinde balalar men qaýip tobyndaǵy azamattardy tolyq kólemde aýrýhanaǵa jatqyzýdy qamtamasyz etýge múmkindik beretinin qosty.
«Balalar qalalyq ınfeksıalyq aýrýhanasynda búginde 360 tósek ashylǵan, biraq taǵy 67 rezervtik tósegimiz bar. Qalalyq klınıkalyq ınfeksıalyq aýrýhanada qazir 200 tósek ashylǵan. Qosymsha 50 rezervtik tósek ashylady. Al qalalyq perzenthanada 70 tósekke arnalǵan bir bólimshe ashylǵan. Epıdemıologıalyq jaǵdaıǵa baılanysty onda qosymsha 10 rezervtik tósek ashylady», — dedi Katkenova.
Ol dári-dármek pen jeke qorǵanys quraldarynyń tapshylyǵy baıqalmaıtynyn málimdedi.