Әлеуметтік желіде Алматының Сатпаев көшесіндегі арық жүйесінің бір бөлігіне жұмысшылар плита төсеп жатқан кадрлар тарады. Пайдаланушылар мұның не үшін жасалып жатқанын сұрады, деп хабарлайды infohub.kz сайты.
Суреттер мен бейнежазба Threads әлеуметтік желісінде жарияланды. Жазба авторы тікелей сұрақ қойды: «Маған түсіндіріңізші, олар мұны не үшін жасап жатыр?» Бейнежазбада мамандардың арық үстіне плита орнатып жатқаны көрінеді.
Жағдайды қаланың қоғамдық кеңістіктерді дамыту басқармасы түсіндірді. Онда Сатпаев көшесінде Байзақов көшесінен Луганский көшесіне дейінгі учаскеде «фасадтан фасадқа дейін» қағидаты бойынша кешенді абаттандыру жобасы жүзеге асырылып жатқаны айтылды. Жоба жаяу жүргінші аймақтарын кеңейтуді, велосипед инфрақұрылымын жайластыруды, көгалдандыруды және сыртқы жарықтандыруды жаңғыртуды көздейді.
«Сатпаев көшесінің оңтүстік жағында, Мүсірепов көшесімен қиылысатын тұста, тар жағдайға байланысты велосипедшілердің қауіпсіз әрі үздіксіз қозғалысын қамтамасыз ету үшін қолданыстағы арық жүйесін арнайы плиталармен шамамен 5-7 метрге ішінара жабу көзделген», — деп хабарлады басқармада.
Ведомствода бұл шешім іргелес жасыл аймақты айтарлықтай қысқартпай-ақ веложолды ұйымдастыруға мүмкіндік беретінін атап өтті.
«Осы учаскеден өткен соң веложол жобада көзделген аумақ бойынша қайта жалғасады. Сонымен қатар арық жүйесі сақталады, оның жер үсті суларын бұру жөніндегі қызметтік мақсаты өзгермейді. Жабу тек жергілікті сипатта және су бұру лотоктарына одан әрі қызмет көрсету мүмкіндігін көздейді», — деп қосты басқармада.
Ведомство көрсетілген жұмыстар бекітілген жобалық шешімдер аясында орындалып жатқанын атап өтті. Олардың мақсаты — қолданыстағы су бұру жүйесін сақтай отырып, жаяу жүргіншілер мен велосипедшілердің қауіпсіз әрі жайлы жүріп-тұруын қамтамасыз ету.