Almatyda 50 myńnan astam turǵyn Dúnıejúzilik tazalyq kúni men Qala kúnine oraı ótken jalpyqalalyq senbilikke qatysty. Ekologıalyq sharalar megapolıstiń barlyq aýdanyn qamtydy, bul týraly qalalyq ákimdik habarlady, dep jazady infohub.kz saıty.
Qala turǵyndary saıabaqtardy, skverlerdi, aýlalardy, qoǵamdyq keńistikter men demalys aımaqtaryn retke keltirdi. Aksıaǵa stýdentter, eriktiler, qoǵamdyq uıymdardyń ókilderi, komýnaldyq qyzmetterdiń, kásiporyndar men mekemelerdiń qyzmetkerleri qosyldy. Jıyn-terimnen bólek, qatysýshylar jasyl jelek otyrǵyzýǵa da kiristi: senbilik barysynda qalada 1 myńnan astam kóshet otyrǵyzyldy.
Basty alańdardyń biri «Aıýsaı» vızıt-ortalyǵy boldy. Munda myńnan astam adam jınaldy — turǵyndar, jastar, eriktiler jáne qalalyq qyzmetterdiń qyzmetkerleri. Olarmen birge aǵash otyrǵyzýǵa Almaty ákimi Darhan Satybaldy da qatysty.
«Aıýsaı» aýmaǵynda 100 qylqan japyraqty aǵash — 50 qaraǵaı men 50 shyrsha otyrǵyzyldy. Bul alańdaǵy jumystar qalanyń basqa bólikterindegi jıyn-terim men kógaldandyrýmen qatar júrdi.
Senbilik prezıdent Qasym-Jomart Toqaev bastamashy bolǵan «Taza Qazaqstan» ulttyq baǵdarlamasy aıasynda ótkizildi. Ákimdikte baǵdarlama qorshaǵan ortaǵa uqypty qaraý men tazalyq mádenıetin damytýǵa baǵyttalǵanyn atap ótti.
Buǵan deıin «Kýrsıv» Dúnıejúzilik tazalyq kúnine oraı sharalar Qazaqstannyń barlyq óńirinde josparlanǵanyn jazǵan. Astanada olar 10 qazanǵa deıin jalǵasatyn ekologıalyq aılyqqa engen, al Túrkistan oblysynda jıyn-terim aǵash otyrǵyzýmen ushtastyrylady.