Almaty men Shanhaı erekshe qajettilikteri bar adamdardy qoldaý boıynsha birlesken jumys týraly kelisimge keldi. Qytaı delegasıasynyń sapary qorytyndysy boıynsha Almaty mamandaryna Qytaı Halyq Respýblıkasyndaǵy klınıka bazasynda ońaltýdyń ozyq ádistemelerin meńgerýge múmkindik beretin memorandým daıyndalýda, dep habarlaıdy infohub.kz saıty.
Almaty ákimdiginiń málimetinshe, megapolıske Shanhaı delegasıasy erekshe qajettilikteri bar adamdardy medısınalyq jáne áleýmettik ońaltý salasynda tájirıbe almasý aıasynda keldi.
Qonaqtar №4 Qalalyq aýrýhana janyndaǵy Travmatologıa jáne ortopedıa óńirlik ortalyǵyna baryp, onda olarǵa tirek-qımyl apparatynyń aýrýlary men jaraqattary bar naýqastarǵa medısınalyq kómek kórsetý jáne ońaltý tásilderi kórsetildi.
Sonymen qatar, delegasıa «Meıirim» ońaltý ortalyǵynda bolyp, balalar men olardyń otbasylaryn ońaltý jáne súıemeldeý tájirıbesimen tanysty.
Jumyspen qamtý bóliginde qalalyq Eńbek mobıldiligi ortalyǵynda delegasıaǵa kásiptik baǵdar berý, jumysqa ornalasýǵa járdemdesý jáne jeke súıemeldeýdiń qoldanystaǵy quraldary tanystyryldy. Onyń ishinde adamǵa jumys ornynda beıimdelýge kómektesetin Job Coach tásili týraly aıtyldy.
Sapar qorytyndysy boıynsha taraptar tájirıbe almasý, birlesken bastamalar jáne áleýmettik ońaltý salasyndaǵy mamandardyń biliktiligin arttyrýdy kózdeıtin yntymaqtastyq týraly memorandým daıyndaýǵa kelisti.
Osy qujat aıasynda almatylyq dárigerler Shanhaıdyń «Ianchjı» ońaltý aýrýhanasynyń bazasynda praktıkalyq tájirıbe ala alady dep josparlanýda. Sondaı-aq birlesken semınarlar men oqytý josparlanǵan.
Buǵan deıin «Kýrsıv» Qazaqstannyń taǵy tórt oblysynda múgedektigi bar balalardy úıde ońaltý iske qosylatynyn jazǵan bolatyn.