Almatyda dıplom tapsyrý saltanatynda túlektiń qujatyn kópshilik kózinshe jyrtyp tastaǵan vıdeosy áleýmettik jelide keń tarap, qyzý talqyǵa tústi, dep habarlaıdy Azattyq Ruhy saıty.
Jazbada jas jigittiń dıplomdy alyp, ony jyrtyp jibergeni kórinedi. Bul áreket jeli qoldanýshylarynyń narazylyǵyn týdyryp, kópshilik ony bilimge, oqý orny men oqytýshylarǵa degen qurmetsizdik dep baǵalady.
Alaıda keıinirek bul aldyn ala josparlanǵan qoıylym ekeni anyqtaldy: kolej stýdenti memlekettik dıplomnyń túpnusqasyn emes, arnaıy daıyndalǵan kóshirmesin jyrtqan. Soǵan qaramastan, Almatydaǵy Halyqaralyq bıznes jáne komýnıkasıalar kolejiniń (ICB) stýdenti Dáýlet Aıdosuly kópshilik aldynda keshirim surady.
«Men, Abdrahman Dáýlet Aıdosuly, Halyqaralyq bıznes jáne komýnıkasıalar kolejiniń (ICB) stýdentimin. Áleýmettik jelilerde taralǵan dıplom tapsyrý rásimindegi beınejazbaǵa baılanysty kolej ujymynan, oqytýshylardan, Bilim basqarmasynan jáne barsha jurtshylyqtan shyn júrekten keshirim suraımyn. Men shyn dıplomymdy jyrtqan joqpyn. Vıdeo úshin aldyn ala daıyndalǵan dıplomnyń kóshirmesin paıdalandym. Meniń áreketimde eshqandaı jaman nıet nemese kolejge jáne onyń qundylyqtaryna qurmetsizdik kórsetý maqsaty bolǵan joq. Bolǵan jaǵdaıǵa shyn júrekten ókinemin jáne mundaı jaǵdaıdyń endi qaıtalanbaıtynyna ýáde beremin», – dedi stýdent.
Aıta keteıik, keń taraǵan vıdeo syn týdyryp, dıplom tapsyrý saltanatynyń máni men ony oqý oryndarynda qurmetteý máselesin taǵy da kóterdi.