Almatyda sýmen jabdyqtaý jáne sý burý tarıfteriniń ósýine elektr energıasynyń qymbattaýy, eńbekaqy shyǵyndarynyń artýy jáne jelilerdiń tozýy sebep boldy. Bul týraly «Almaty Sý» bas dırektorynyń orynbasary Jandos Takıbaev málimdedi, dep habarlaıdy infohub.kz saıty.
Eske salaıyq, 2026 jylǵy 1 qazannan bastap Almaty turǵyndary sýyq sý úshin tekshe metrine 178,06 teńge, al sý burý úshin 119,46 teńge tóleıdi.
Takıbaevtyń aıtýynsha, sýmen jabdyqtaý men sý burý energıany kóp qajet etetin prosester, sondyqtan elektr energıasy qunynyń ózgerýi qyzmettiń ózindik qunynyń ósýine ákeledi. Sondaı-aq reagentter, materıaldar, qosalqy bólshekter, jabdyqtar jáne nysandardy paıdalanýǵa qajetti basqa da resýrstarǵa jumsalatyn shyǵyndar ósti.
«Ekinshi mańyzdy faktor — qyzmetkerlerdiń jalaqy deńgeıin retteý. Eńbekaqy tóleý shyǵyndary qyzmetterdiń óndiristik ózindik qunynyń bóligi bolǵandyqtan, eńbekaqy qorynyń túzetilýi tarıfte eskeriledi», — dedi ol.
Tarıfterdiń ósýiniń taǵy bir sebebi — paıdalanýdaǵy komýnaldyq ınfraqurylym kóleminiń aıtarlyqtaı ulǵaıýy. Máselen, sońǵy eki jylda jalpy quny 73,2 mlrd teńge bolatyn nysandar iske qosyldy: 32 káriz sorǵy stansıasy, 6 sorǵy stansıasy, 9 taza sý rezervýary, 18 uńǵyma, 385 km sý qubyry jelileri jáne 374 km káriz jelileri.
«Árbir iske qosylǵan nysan elektr energıasyna, tehnıkalyq qyzmet kórsetýge, jóndeýge, materıaldarǵa, personalǵa jáne apattyq den qoıýǵa turaqty shyǵyndardy talap etedi», — dep qosty «Almaty Sý» dırektorynyń orynbasary.
Tórtinshi faktor — ınvestısıalyq mindettemeler jáne ınfraqurylymdy jańartý qajettiligi. Jeliler men jabdyqtar fızıkalyq turǵydan tozady, sonymen qatar Almatynyń damýymen birge sýmen jabdyqtaý jáne sý burý júıesine júkteme artyp keledi. Sondyqtan qoldanystaǵy ınfraqurylymdy ustap turý ǵana emes, ony ýaqtyly qaıta jańartý jáne modernızasıalaý, jelilerdiń ótkizý qabiletin arttyrý jáne jańa nysandardy qosýǵa múmkindik jasaý qajet.
«Búginde ustaýǵa qajet ınfraqurylym kólemi ózgerdi, paıdalaný shyǵyndary ósti, júıege júkteme artty jáne qosymsha ınvestısıalar qajettiligi týyndady», — dep atap ótti Takıbaev.
«Almaty Sý» tarıftiń ósýi esebinen alynǵan qarajattyń barlyǵy jelilerdi jóndeýge jáne jabdyqtardy jańartýǵa jumsalatynyn ýáde etti.
Buǵan deıin «Kýrsıv» 2026 jylǵy 12 qyrkúıekten bastap «Alataý Jaryq Kompanıasy» elektr energıasyn bólshek saýdada ótkizýdiń shekti baǵasyn 1 kVtsaǵ úshin 45,59 teńgege deıin kótergenin jazǵan bolatyn.