18 shilde, senbi kúni Almatyda jazǵy keshki Summer Relay estafetasyna baılanysty tarıhı ortalyqtaǵy birneshe kóshede kólik qozǵalysy ýaqytsha shekteledi, dep habarlaıdy infohub.kz saıty.
Qala ákimdiginiń málimetinshe, bıyl júgirý marshrýty alǵash ret tarıhı ortalyq arqyly ótedi. Estafeta Tóle bı, Qabanbaı batyr, Panfılov kósheleri men Abylaı han dańǵylynda uıymdastyrylady.
Eń uzaq shekteý Tóle bı kóshesiniń Panfılov kóshesinen Abylaı han dańǵylyna deıingi bóliginde bolady. Bul ýchaskede qozǵalys 18 shilde saǵat 09:00-den 19 shilde saǵat 06:00-ge deıin jabylady.
Qalǵan shekteýler 18 shildede saǵat 20:00-den 23:00-ke deıin engiziledi. Bul ýaqytta myna kósheler jabylady: Abylaı han dańǵyly – Tóle bı kóshesinen Qabanbaı batyr kóshesine deıin; Qabanbaı batyr kóshesi – Abylaı han dańǵylynan Nazarbaev dańǵylyna deıin; Panfılov kóshesi – Qabanbaı batyr kóshesinen Tóle bı kóshesine deıin.
Jarys baǵdarlamasy 18:00-de balalardyń 500, 1000 jáne 2000 metr qashyqtyqqa júgirýimen bastalady. Saǵat 20:00-de 2 shaqyrymdyq jappaı júgirý, al 21:00-de komandalyq Summer Relay estafetasy ótedi. Bes adamnan turatyn komandalar 10 shaqyrym qashyqtyqty eńseredi.
Uıymdastyrýshylar qala turǵyndary men qonaqtaryna marshrýtty aldyn ala josparlap, qozǵalys sqemasyndaǵy ýaqytsha ózgeristerdi eskerýdi usynady.