2026 jyldyń birinshi jartyjyldyǵynda Almatyda profılaktıkalyq tekserýler qorytyndysy boıynsha 200-den astam áıelde sút bezi qaterli isigi anyqtaldy. Jalpy osy kezeńde 250-den astam onkologıalyq aýrý tirkeldi. Bul derekter qalalyq qoǵamdyq densaýlyq saqtaý basqarmasynyń keńesinde jarıalandy, dep habarlaıdy infohub.kz saıty.
«Jyldyń alǵashqy alty aıynda Almatyda skrınıngtik zertteýler nátıjesi boıynsha 200-den astam sút bezi qaterli isigi jáne 58 kolorektaldy isik anyqtaldy», — delingen habarlamada. Barlyq pasıent dıspanserlik baqylaýǵa alynǵany atap ótildi.
Kolorektaldy isikke skrınıngten 108 myńnan astam turǵyn ótti. Onyń qorytyndysy boıynsha 803 túrli patologıa anyqtaldy, onyń ishinde toq jáne tik ishektiń 745 qatersiz jáne 58 qaterli isigi bar.
Keńes qorytyndysy boıynsha medısınalyq uıymdarǵa skrınıng nátıjesi oń bolǵan pasıentterge tekserýdiń ekinshi kezeńin ótkizý tapsyryldy. Ol «jasyl dáliz» qaǵıdaty boıynsha 3–5 jumys kúni ishinde júrýi tıis.
Sondaı-aq onkologıalyq aýrýlardy anyqtaý kórsetkishi nólge teń medısınalyq uıymdarǵa apta saıynǵy monıtorıń jáne alǵashqy medısınalyq-sanıtarlyq kómek uıymdarynyń jumysyna aı saıynǵy taldaý uıymdastyrý josparlanýda.
Sonymen qatar, skrınıngtik zertteýlerdiń sapasyn arttyrýǵa erekshe kóńil bólinbek. Jeke klınıkalarda syrtqy aýdıt júrgiziledi, al jumys isteıtin turǵyndar úshin keshki ýaqytta jáne senbi kúnderi skrınıngten ótýge arnalǵan jeke saǵattar uıymdastyrý josparlanýda.
Buǵan deıin Qazaqstanda onkologıaǵa kúdikti pasıentterge kezeksiz tekserilýge múmkindik beretin «jasyl dáliz» júıesi engizilgeni habarlanǵan bolatyn.