Almatyda «sút bezi qaterli isigi» dıagnozymen 20-ǵa jýyq er adam esepte tur. Bul týraly óńirlik komýnıkasıalar qyzmeti alańynda ótken brıfıńte Almaty onkologıalyq ortalyǵynyń ókilderi aıtty, dep habarlaıdy infohub.kz saıty.
Ortalyq dárigerleri eń jas jáne eń úlken jastaǵy naýqastar jaıynda áńgimeledi. Anyqtalǵany, sút bezi qaterli isigi tek áıelderge ǵana tán emes.
«Bıyl Almaty onkologıalyq ortalyǵynda tirkelgen eń jas naýqastyń jasy — 21-de. Men sol naýqasty óz qolymmen esepke aldym. Qazirgi tańda ol onkoınstıtýt jaǵdaıynda keshendi em qabyldap jatyr. Em sátti ótip, nátıjesin kórip otyrmyz. Al qaterli isik jyl saıyn jasaryp barady», — dep túsindirdi Almaty onkologıalyq ortalyǵynyń onkolog-mammolog dárigeri Balzıa Qalymbetova.
Al eń úlken jastaǵy naýqas — sút bezi qaterli isigimen aýyrǵan 93 jastaǵy áıel.
«Negizinen, sút bezi qaterli isiginiń jas shekteýi joq. Er adamdarda da sút bezi qaterli isigi damýy múmkin. Almaty onkologıalyq ortalyǵynda 20-ǵa jýyq er adam esepte tur. Árıne, erlerde sırek kezdesedi, biraq soǵan qaramastan erler de qaýip tobynda, ókinishke qaraı», — dep qosty Almaty onkoortalyǵynyń konsýltasıalyq-dıagnostıkalyq bóliminiń meńgerýshisi Aqbota Ádilova.
Dárigerlerdiń aıtýynsha, bıylǵy segiz aıda sút bezi qaterli isiginiń 659 jaǵdaıy anyqtalǵan.
«Onyń ishinde 5 áıelde nóldik saty, 305 áıelde birinshi saty, 312 naýqasta ekinshi saty, 20 áıelde úshinshi saty jáne 17 naýqasta tórtinshi saty anyqtaldy. Negizinen, qaterli isik ekinshi satyda anyqtalady», — dedi Balzıa Qalymbetova.