Almatydaǵy Bas botanıkalyq baqta 31 tamyzda 72 jasar tal — vavılon taly kesildi. Kelýshiler ony «Eıva» dep atap ketken edi. Muqıat tekserý nátıjesinde aǵashtyń qatty zaqymdanǵany anyqtalyp, ony alyp tastaý týraly sheshim qabyldandy, dep habarlaıdy infohub.kz.
Mamandar taldyń dińiniń túbinde tereń qýys, qabyǵynyń qabyrshaqtanýy, diń zıankesterinen kelgen zaqymdar men ózeginiń shirýin anyqtady. Taldy egjeı-tegjeıli tekserýge 16 maýsymda qatty jel men naızaǵaı kezinde uzyndyǵy 10 metrden asatyn iri butaqtyń synýy sebep boldy. Qulaǵan kezde qorshaýlar men jaıaý júrginshiler jolynyń bir bóligi zaqymdanǵan, alaıda kelýshilerdiń eshqaısysy zardap shekken joq.
Baq ókilderi: «Eski aǵashtardyń syrtqy kelbeti árqashan olardyń ishki jaı-kúıin kórsete bermeıdi. Bul jaı ǵana eski aǵash emes, óziniń ǵylymı tarıhy men birneshe urpaq almatylyqtar úshin mádenı qundylyǵy bar koleksıalyq aǵash bolǵandyqtan, onyń taǵdyry týraly másele erekshe salmaqty sheshimdi qajet etti», — dep atap ótti.
Tal botanıkalyq baqta 1954 jyldan beri ósip keledi, ony Qaraǵandydan qalemsheler arqyly ákelgen. Jeti onjyldyqtan astam ýaqyt boıy aǵash Botanıka jáne fıtoıntrodýksıa ınstıtýtynyń ǵylymı koleksıasynyń quramynda bolyp, baqtyń tanymal kórikti jerleriniń birine aınaldy.
Eski taldyń qasynda murager aǵash ósip tur. Jas tal 2022 jyly otyrǵyzylǵan, qazir ol belsendi ósý kezeńinde. Botanıkalyq baqta «tal-murager óziniń aldyńǵysynyń tarıhyn jalǵastyryp, ýaqyt óte Bas botanıkalyq baqtyń jańa sımvoly mártebesine ıe bolady» dep úmittenedi.