Tań ata Almaty turǵyndary áleýmettik jelilerde sezgen jerasty silkinisteri týraly jaza bastady. Bolǵan oqıǵanyń mán-jaıyn qalalyq Tótenshe jaǵdaılar departamenti aıtty, dep habarlaıdy infohub.kz saıty.
Áleýmettik jelilerde almatylyqtar óz sezimderin árqalaı sıpattady. Threads jelisindegi nindzyamalysh degen paıdalanýshy bylaı dep jazdy: «Almaty, men jer silkinisin ózim oıdan shyǵaryp aldym ba? Úıdegilerdiń eshqaısysy sezgen joq, jańalyq ta joq. Biraq men gúildi jáne birtindep basylǵan qysqa dirildi anyq estidim».
aminowiz degen laqap atpen jazylǵan taǵy bir paıdalanýshy: «Ýaqyt 6:34, Almatyda meteorıt túskendeı birdeńe qulaǵandaı boldy maǵan. Kórshiler birdeńe túsirip aldy dep oıladym. Biraq toptaǵy dostarym olarda da qandaı da bir shý bolǵanyn jazdy. Mine, osyndaı bir sekýndtyq jer silkinisi de bolady eken, al eskertý kelmeıdi», — dep atap ótti.
Keıbir qala turǵyndary silkinisten úı qabyrǵalary dirildegenin aıtty. orazgul.nt akkaýntynda bylaı delingen: «Almaty, 06:33-te jer silkinisi boldy, tipti qatty kúshti soqqy boldy, qabyrǵalar dirildedi! Biz Naýryzbaı aýdanyndamyz, jeke úı, taǵy kim sezdi? Jerge aýyr birdeńe qulaǵandaı».
Alaıda Almaty TJD megapolıste sezilmegenin málimdedi. Vedomstvo Qazaqstan Respýblıkasy Tótenshe jaǵdaılar mınıstrliginiń Seısmologıalyq baqylaýlar men zertteýler ulttyq ǵylymı ortalyǵynyń málimetterine silteme jasady.
Onda búgin Astana ýaqytymen 06:32-de Qazaqstan aýmaǵynda seısmıkalyq oqıǵa tirkelgeni rastaldy. «Almaty qalasynda sezilmedi. Jer silkinisine baılanysty oqıǵalar men ótinishter týraly habarlamalar Almaty qalasynyń TJD-ǵa túsken joq», — dedi baspasóz qyzmetinde.