Almaty taýlarynda 28 qyrkúıekte toptan bólinip, jalǵyz júrip ketken sheteldik azamatty izdeý-qutqarý jumystary jalǵasyp jatyr, dep habarlaıdy infohub.kz saıty.
Tótenshe jaǵdaılar mınıstrliginiń málimetinshe, Talǵar asýy mańynda, shamamen 3200 metr bıiktikte 1953 jyly týǵan sheteldik izdestirilýde. Ol 28 qyrkúıekte top quramynda «Shymbulaq» kanat jolymen kóterilgen.
«Osydan keıin ol áriptesterine marshrýtty jalǵyz jalǵastyryp, qalaǵa súıemeldeýsiz túsetinin aıtqan. Alaıda qonaqúıge oralmaǵan. 29 qyrkúıekte onyń joǵalǵany týraly aqparat "112" púltine tústi. Sol kúni TJM dereý izdeý-qutqarý jumystaryn uıymdastyrdy. Almaty qalasy TJD jedel shtaby ornalastyryldy», — delingen vedomstvo habarlamasynda.
Qıyn jetetin ýchaskelerdi tekserýge TJM kúshteri men quraldary, Almaty qalasynyń monıtorıń jáne jedel den qoıý ortalyǵy, kınologıalyq esepter, TJM «Barys» respýblıkalyq qutqarý qyzmetiniń qutqarýshylary, polısıa departamentiniń qyzmetkerleri, «DSS» eriktileri jumyldyryldy. Barlyǵy 50-ge jýyq adam, 8 tehnıka birligi, 7 ushqyshsyz ushý apparaty, 3 kınologıalyq esep jáne «Qazavıaspas» tikushaǵy tartyldy.
«Qazavıaspas» tikushaǵynyń ekıpajy Soltústik Talǵar, Bogdanovıch muzdyǵy jáne oǵan irgeles shatqaldardaǵy shyńdar men asýlarǵa qaraı taý marshrýttaryn tekserdi. Sondaı-aq 7 ushqyshsyz ushý apparatyn paıdalanyp, jaıaý izdeý toptary qıyn jetetin ýchaskeler men taý soqpaqtaryn tekseredi, beınebaqylaý kameralarynyń jazbalaryn qaraý jáne izdeý jumystary júrgizilgen aýdanda bolǵan týrıserden suraý jalǵasýda.
«İzdeý-qutqarý jumystary táýlik boıy jalǵasyp jatyr. Qutqarýshylar kúrdeli relefti, bıiktikti jáne jekelegen ýchaskelerdiń qıyn jetetinin eskere otyryp, taýly jerdi tekseredi», — dep sendirdi TJM.