Almaty prokýratýrasy sot arqyly qala ortalyǵynda ornalasqan burynǵy temirjol aýrýhanasynyń jeri men ǵımaratyn memleket menshigine qaıtardy. Shyǵarylǵan aktıvterdiń jalpy quny 2 mlrd teńgeden asady, dep habarlaıdy infohub.kz.
Nysan men oǵan irgeles jerler buryn Temirjol apattar medısınasy gospıtaline tıesili bolǵan. 2018 jyly birqatar mámileler nátıjesinde múlik básekeles ortadan tys jeke menshikke shyǵarylǵan. Sotta Almaly aýdanynyń prokýrorlary jer men jyljymaıtyn múlikti satý Qazaqstannyń jer jáne múlik zańnamasyn aınalyp ótkenin, al mámileler tizbegine qatysýshylardyń ózara baılanysty tulǵalar ekenin dáleldedi.
Buǵan deıin qala prokýratýrasy atqarýshylyq is júrgizý boıynsha saýda-sattyqty joıyp, nysannyń úshinshi tulǵalarǵa qaıta satylýyna jol bermegen. Sot memlekettik múlikti ıelikten shyǵarý boıynsha barlyq mámilelerdi jaramsyz dep tanydy. Nátıjesinde memleketke: aýdany 1628 sharshy metr ǵımarat, jalpy aýdany 0,3 ga eki jer telimi qaıtaryldy. Múliktiń jalpy baǵasy — 2 mlrd teńgeden astam. Apelásıalyq alqa sheshimdi ózgerissiz qaldyrdy.
Burynǵy temirjol aýrýhanasynyń ǵımaraty óziniń kolonnalary, arkalary, sáýlettik áshekeıleri men ulttyq oıý-órnekteri bar sáýletimen almatylyqtardyń nazaryn aýdarǵan. Ol 1948–1950 jyldary sáýletshi Kýdrávsevtiń jobasy boıynsha salynǵan jáne bastapqyda Túrksib aýrýhanasy dep atalǵan. 2024 jyly Abaı dańǵyly men Masanchı kóshesiniń qıylysynda ornalasqan ǵımaratta órt boldy: ekinshi qabatta qoqys janyp ketken. Órt tez sóndirildi, biraq izderi qaldy.