Алматыда қала тұрғыны Тимирязев пен Байтұрсынов көшелерінің қиылысындағы аялдама маңында жақында жасалған жөндеуден кейін плитка қайта төселіп жатқанын байқаған. Анықталғандай, бұл жұмыстар көшені абаттандыру әлі аяқталмағанына байланысты, деп хабарлайды infohub.kz сайты.
Алматыда Тимирязев көшесін абаттандыру жалғасуда. Жұмыстар Байтұрсынов көшесімен қиылысқан жердегі аялдаманы да қамтыды, онда жақында жасалған жөндеуден кейін плитка қайта төселуде.
Қайталама жұмыстарға Threads желісіндегі @raushan_zhakupova_ пайдаланушысы назар аударды. Ол жазда неге аймақты жөндеп, бір айдан кейін қаптаманы қайта алып, басқасын төсетінін сұрады.
«Жазда жөндеу жасап, бір айдан кейін бәрін қайта алып, басқа плитка төсудің мәні неде???» — деп жазды ол.
Алматының қоғамдық кеңістіктерді дамыту басқармасы көшені абаттандыру әлі аяқталмағанын түсіндірді. Жоба аумақты кешенді түрлендіруді көздейді.
«Қазіргі таңда Байтұрсынов көшесінен Жандосов көшесіне дейінгі Тимирязев көшесін «фасадтан фасадқа дейін» қағидаты бойынша түрлендіру жобасы жүзеге асырылуда. Жобада көгалдандыру, автоматты суару құрылғысын орнату, жарықтандыру тіреулері мен шағын сәулет нысандарын қою, веложол салу және қышқаптама төсеу қарастырылған. Сіздің өтінішіңізге қатысты айтарымыз, бұл аймақтағы құрылыс-монтаж жұмыстары әлі аяқталмаған. Қазіргі таңда сіз көрсеткен аялдамада жобаға сәйкес тактильді плитка төселуде», — делінген хабарламада.