Almaty ákimdigi máslıhattyń turǵylyqty jeri boıynsha tirkelýdiń jańa normatıvterin belgileıtin sheshim jobasyn qoǵamdyq talqylaýǵa shyǵardy. Qujat «Ashyq NQA» portalynda jarıalanǵan, dep habarlaıdy infohub.kz.
«Almaty qalasy aýmaǵynda turǵylyqty jeri jáne ýaqytsha bolatyn (turatyn) jeri boıynsha tirkelý normatıvin bekitý týraly» dep atalatyn jobany ákimdik ázirlegen. Qala turǵyndary talqylaýǵa 26 tamyzǵa deıin qatysa alady.
Ákimdikte bul bastama halyqty esepke alý júıesin jetildirýge, kóshi-qon prosesterin baqylaýdy qamtamasyz etýge, sondaı-aq memlekettik qyzmetterdi josparlaý men kórsetý tıimdiligin arttyrýǵa baǵyttalǵanyn túsindirdi. «Jobanyń maqsaty — tirkelý prosesterin retke keltirý, ınfraqurylymdyq jáne áleýmettik júktemeni josparlaýdy jaqsartý, sondaı-aq turaqty turatyn jáne ýaqytsha keletin azamattarǵa memlekettik qyzmetterdi kórsetý tıimdiligin arttyrý», — dep atap ótti vedomstvoda.
Krisha.kz-tiń habarlaýynsha, qujat páterde nemese úıde tirkelýge bolatyn azamattar sanyn shekteýdi kózdeıdi. Normatıv turaqty jáne ýaqytsha tirkelý úshin belgilenbek: bir tirkelgen adamǵa keminde 15 sharshy metr aýdan tıesili bolýy kerek. Mysaly, aýdany 60 sharshy metr páterge menshik ıesiniń otbasy músheleri men jaqyn týystarynan basqa tek tórt adamdy tirkeýge bolady — olarǵa shekteý qoldanylmaıdy. Mundaı qaǵıdat Astanada qoldanylyp keledi.