Almatyda drıft, qatty shyqqan shyǵaryndy gaz jáne qaýipti manevrler túngi reıdke sebep boldy. Birneshe saǵat ishinde polıseıler jol qozǵalysy erejeleriniń 160 buzýshylyǵyn anyqtady, dep habarlaıdy infohub.kz saıty.
NUR.KZ megapolıs polısıa departamentine silteme jasap habarlaǵandaı, reıd 30 qyrkúıekke deıin jalǵasatyn «Shýly kólik» is-sharasy aıasynda ótti.
«Keshe arnaıy ákimshilik polısıa batalónynyń qyzmetkerleri men basqa da qurylymdyq bólimsheler reıdke shyqty. Drıft áýesqoılary, qaýipti manevrler, qatty shyǵaryndy gaz jáne jol qozǵalysy erejelerin óreskel buzýshylar nazarda boldy. Bir túnde ǵana JQE-niń 160 buzýshylyǵy anyqtaldy. Reıd barysynda eń kóp kezdeskenderi: tynyshtyqty buzýdyń 33 faktisi, ruqsatsyz qaıta jabdyqtalǵan kólik basqarýdyń 31 oqıǵasy, manevrleý erejelerin buzýdyń 24 jaǵdaıy, apattyq jaǵdaı týǵyzýdyń 12 faktisi», — delingen habarlamada.
Sonymen qatar, mas kúıindegi alty júrgizýshi anyqtaldy.
İshki ister mınıstrliginiń aqparattyq medıaportaly habarlaǵandaı, aıyppul turaǵyna 74 kólik quraly, onyń ishinde sheteldik memlekettik tirkeý nómirleri bar 11 avtomobıl jáne bir motosıkl qoıyldy.
«Qozǵaltqyshtyń áserli dybysy, kenetten júrip ketý nemese túngi drıfttiń artynda naqty qaýip tur — bul tek turǵyndardyń tynyshtyǵyna ǵana emes, sonymen qatar barlyq jol qozǵalysyna qatysýshylardyń qaýipsizdigine de qater. Polısıanyń ustanymy aıqyn: Almaty joldary — jarys pen jyldamdyqty kórsetý orny emes. «Zań jáne tártip» qaǵıdaty barlyǵyna ortaq — jol qozǵalysy erejelerin saqtaý árkim úshin mindetti», — dep atap ótti polısıada.
Buǵan deıin biz úkimet otyrysynda Qazaqstan premer-mınıstri túngi ýaqytta joldarda shý shyǵaratyn júrgizýshilerdi «aıyppul salýdyń qajeti joq, olardy qamaýǵa alý kerek» dep málimdegenin habarlaǵan bolatynbyz.