Almatyda komýnaldyq aqyly turaqtardy paıdalaný erejeleri ózgeredi. Qalalyq máslıhat turaq keńistigin uıymdastyrýdyń, avtomobılderdi evakýasıalaýdyń jáne aýlalarǵa shlagbaým ornatýdyń jańa tártibin bekitti, dep habarlaıdy infohub.kz saıty.
Eń basty jańalyq — turaq aqysy endi mınýt saıyn tólenedi. Sonymen qatar, kóppáterli úılerdiń turǵyndary úıiniń janynan bir tegin oryn rásimdeı alady. Qujat jekelegen sanattaǵy azamattar men elektromobıl ıelerine jeńildikterdi de bekitedi, sondaı-aq avtomobılderdi evakýasıalaý erejelerin ózgertedi. Sheshim resmı jarıalanǵannan keıin 10 kúnnen soń kúshine enedi.
Turaq quny árbir naqty ótkizilgen mınýt úshin esepteletin bolady. Tarıfterdi burynǵydaı máslıhat bekitedi. Sonymen qatar, tegin aralyqtar saqtalady: trotýardaǵy turaqtarda 5 mınýt; alańdyq, jerasty jáne kópdeńgeıli turaqtardan shyǵý úshin 10 mınýt. Turaq aqysyn aldyn ala nemese turaq aıaqtalǵannan keıin sol kúni keshke deıin tóleýge bolady.
Komýnaldyq aqyly turaqtardy tegin paıdalana alady: UOS, basqa da urys qımyldarynyń ardagerleri jáne eńbek ardagerleri; I jáne II toptaǵy múgedektigi bar adamdar; múgedek balalardyń zańdy ókilderi; «Altyn alqa», «Kúmis alqa» nagradalarynyń ıegerleri, «Batyr ana» ataǵy jáne «Ana dańqy» ordenderiniń ıegerleri; Semeı polıgonyndaǵy synaqtardan zardap shekken azamattar; elektromobıl ıeleri. Jeńildik polısıa, jedel járdem, órt sóndirý qyzmeti jáne qyzmettik mindetterin atqaratyn basqa da arnaıy tehnıka avtomobılderine de qoldanylady.
Páter ıeleri men jalǵa alýshylar úıiniń janynan bir tegin turaq ornyn rásimdeı alady. Ol úshin: úıden 500 m aspaıtyn qashyqtyqtaǵy turaqty tańdaý; basqarýshy uıymǵa ótinish berý; jeńildikti tek bir avtomobılge rásimdeý qajet. Eger turǵyn úı nemese avtomobıl ortaq menshikte bolsa, qalǵan ıeleriniń jazbasha kelisimi qajet bolady.
Qujat evakýasıa prosedýrasyn da egjeı-tegjeıli retteıdi. Mashınany tıeý aldynda qyzmetkerler: tekserý aktisin jasaýǵa; barlyq zaqymdardy tirkeýge; foto- jáne beınetúsirilim júrgizýge mindetti. Erejelerde avtomobıldi bamperlerden, plasık elementterden jáne basqa da sándik bólshekterden bekitýge tyıym salynatyny kórsetilgen. Eger salonnan qarý, oq-dári nemese kúdikti zattar tabylsa, evakýasıa polısıa kelgenge deıin toqtatylady. Avtomobıldi aıyppul turaǵynan táýliktiń kez kelgen ýaqytynda alýǵa bolady. Eger evakýasıa kúni saǵat 18:00-ge deıin jasasańyz, saqtaý aqysy alynbaıdy.
Shlagbaým ornatý úshin páter ıeleriniń keminde úshten ekisiniń qoldaýy qajet bolady. Bul rette tótenshe qyzmetterdiń ótýi shlagbaýmnyń jaǵdaıyna qaramastan qamtamasyz etilýi tıis.