Almatyda komýnaldyq aqyly turaqtardyń tarıfterin qaıta qaraý usynylyp otyr: qazir turaq saǵaty ornyna qaramastan 100 teńge turady, alaıda qala biryńǵaı mólsherlemeden bas tartpaq, dep habarlaıdy infohub.kz saıty.
Qalalyq ákimdiktiń baspasóz qyzmetiniń málimetinshe, qoldanystaǵy tarıf 2016 jyldan beri kúshinde. Osy ýaqyt ishinde megapolıstegi kólik sany mıllıonnan asyp ketti, sonyń saldarynan joldarda jáne turaqtardyń janynda jıi retsizdik týyndaıdy: júrgizýshiler bos oryn izdep ortalyqty saǵattap aınalyp júredi, keptelis jasaıdy jáne kólikterin ekinshi qatarǵa qaldyrady.
Endi turaq qunyn kóshelerdiń júktemesine baılanystyrý usynylyp otyr. Joba Almaty máslıhatynyń sesıasynda tanystyryldy:
Saǵatyna 100 teńge — kólik az jerlerde;
Saǵatyna 150 teńge — ortasha júktemesi bar aımaqtarda;
Saǵatyna 200 teńge — suranysy joǵary eń tanymal oryndarda (mysaly, iri saýda ortalyqtarynyń janynda).
Mundaı tásil álemniń basqa da qalalarynda qoldanylady. Máskeýde turaq quny naqty kósheniń júktemesine baılanysty. Ortalyq aýdandarda tarıfter saǵatyna 600 rúblge (shamamen 3200 teńge) jetedi, al keıbir ýchaskelerde dınamıkalyq baǵa saǵatyna 800 rúblge (shamamen 4300 teńge) deıin barady.
Eýropa qalalarynda da turaq qunyn saralaý keń taralǵan. Mysaly, Amsterdam ortalyǵynda turaq saǵaty orta eseppen 4,22 eýro (shamamen 2200 teńge), al keıbir ortalyq kóshelerde 7,50 eýro (shamamen 3900 teńge) turady. Eýropalyq kólik qaýymdastyǵynyń zertteýi turaq qunyn arttyrý kóshedegi turaq oryndaryna suranysty jáne avtomobılmen júrip-turý sanyn azaıtýy múmkin ekenin kórsetti.
Álemdik tájirıbemen salystyrǵanda, bizdiń saǵatyna 200 teńgemiz óte qarapaıym.
Sonymen qatar Almatyda aqyly turaqtardyń janyndaǵy úılerdiń turǵyndary úshin jeńildikter saqtalady. Olar arnaıy ruqsat rásimdep, úıiniń janyndaǵy turaq oryndaryn tegin paıdalana alady.
Joba avtorlarynyń pikirinshe, jańa júıe eń júktemesi joǵary aýdandardaǵy turaq oryndaryn bosatýǵa múmkindik beredi. Sonymen qatar qala eń suranysqa ıe turaqtardan kóbirek tabys ala alady.
Buǵan deıin Kursiv LifeStyle Almaty máslıhatynyń depýtattary Medeý men Shymbulaqqa avtomobılderdiń kirýiniń jańa erejeleri jobasyn qoldaǵanyn jazǵan bolatyn. Jobany Almaty ekologıa jáne qorshaǵan ortany qorǵaý basqarmasy basshysynyń orynbasary Arshat Baqtygereev tanystyrdy.