Almatyda Úlken Almaty ózeniniń jańadan jańartylǵan jaǵalaýyndaǵy baspaldaqtardyń búlingeni týraly kadrlar áleýmettik jelilerde tarady. Kóp mıllıardtyq qaıta jańǵyrtý jumystary endi ǵana aıaqtalǵan bolatyn. Qalalyq ekologıa jáne qorshaǵan ortany qorǵaý basqarmasy buǵan vandalızm sebep bolǵanyn málimdedi, dep habarlaıdy infohub.kz saıty.
Jaǵalaýda túsirilgen beınejazba egovpress Telegram-arnasynda jarıalandy. Kadrlarda jańa baspaldaqtyń bir bóligi qıraǵany kórinedi.
NUR.KZ tilshisi Almaty ákimdiginiń baspasóz qyzmetine suraý joldap, onda qalalyq ekologıa jáne qorshaǵan ortany qorǵaý basqarmasynyń jaýabyn berdi.
«Úlken Almaty ózeniniń boıyndaǵy abattandyrý alańynda jeke júrip-turý quraldarymen (samokattarmen) júretin adamdardyń vandaldyq áreketteri saldarynan abattandyrýdyń jekelegen elementteriniń búlingeni anyqtaldy. Qazirgi tańda merdiger uıym kepildik mindettemeler aıasynda óz qarajaty esebinen anyqtalǵan aqaýlardy joıý jáne búlingen elementterdi qalpyna keltirý jumystaryn júrgizýde», — dedi basqarmada.
Shart talaptarynda 3 jyldyq kepildik merzimi qarastyrylǵany atap ótildi. Osy kezeńde kepildik mindettemelerge jatatyn aqaýlardy merdiger uıym joıýǵa tıis.
Basqarma sondaı-aq aqaýlary joıylǵan baspaldaqtardyń sýretterin usyndy.