2022 jylǵy qańtar oqıǵasynan tórt jyl ótse de, Qazaqstanda sol kezde urlanǵan qarý áli de tabylyp jatyr. Tek qyrkúıek aıynda polısıa toǵyz birlik qarý tárkiledi, al 2026 jyldyń basynan beri zańsyz aınalymnan 1700-den astam qarý alyndy, dep habarlaıdy infohub.kz saıty.
Tamyzda polıseıler Almaty men Óskemende 2022 jyldyń qańtarynda Almatydaǵy qarý dúkenderinen urlanǵan úsh birlik qarýdy tapty. Ol Almaty oblysynyń eki turǵynynan tárkilendi.
Qyrkúıektiń basynda Tarazda jergilikti turǵyn ustaldy. Onyń úıinde Jambyl oblysyndaǵy qańtar oqıǵasy kezinde urlanǵan Makarov tapanshasy saqtalǵan. Kúdiktiler qamaýǵa alyndy, tergeý jalǵasýda.
2026 jyldyń basynan beri polısıa zańsyz aınalymnan 1700-den astam qarý tárkiledi, onyń ishinde 34 avtomat, 458 tapansha, myńnan astam myltyq jáne úsh granatomet bar. Sondaı-aq quqyq qorǵaýshylar shamamen 12 myń oq-dári tárkiledi. Bul statısıkaǵa 2022 jyldyń qańtarynda urlanǵan 152 birlik qarý da kiredi.
İshki ister mınıstrligi qarýdy erikti túrde tapsyrý aksıasyn bólek ótkizýde. 20 sáýirden bastap el turǵyndary 900-den astam qarý men alty myńǵa jýyq oq-dári tapsyrdy.
«Zańsyz saqtalǵan qarýdy erikti túrde tapsyrǵan adamdar zańda belgilengen tártippen qylmystyq jáne ákimshilik jaýapkershilikten bosatylady», — dep habarlady İİM.
Vedomstvo qarýdyń zańsyz saqtalǵan jerleri týraly polısıaǵa 102 nómiri arqyly nemese eOtinish servısi arqyly habarlaýǵa bolatynyn eske saldy. İİM anonımdilikke kepildik beredi.
Buǵan deıin «Kýrsıv» Qańtar kezinde joǵalǵan oq-dárileri bar jasyryn qoımanyń kútpegen jerden tabylǵanyn jazǵan bolatyn: qoıma tasjoldyń boıyndaǵy aryqta ornalasqan.