1 tamyzdan bastap Almatydaǵy Naýryzbaı batyr kóshesinde jańa velojolaq úshin qoǵamdyq kóliktiń qozǵalys sqemasy ózgeredi, dep habarlady infohub.kz saıty.
Ózgerister Raıymbek dańǵyly men Abaı dańǵyly aralyǵyndaǵy ýchaskege qatysty. Bul jerde avtobýsqa arnalǵan bólingen jolaq alynyp, arnaıy velojolaq salynady.
Almaty qalalyq mobıldilik basqarmasynyń málimetinshe, qazir Naýryzbaı batyr kóshesimen júretin avtobýs baǵyttary Jeltoqsan kóshesine aýystyrylady. Bul velosıpedshilerdiń qozǵalysy úshin bólek keńistik bólýge múmkindik beredi. Eske salaıyq, 2025 jyldyń jeltoqsanynan bastap Jeltoqsan kóshesinde BRT (Bus Rapid Transit – jyldam avtobýs qatynasy) jańa jelisi iske qosylǵan bolatyn.
«Ózgerister velosıpedshilerdiń qaýipsizdigin arttyrýǵa, qalalyq veloınfraqurylymdy damytýǵa jáne kólik aǵyndaryn tıimdi bólýge baǵyttalǵan», — delingen basqarma habarlamasynda.
Júrgizýshiler men jol qozǵalysynyń basqa da qatysýshylary ózgeristerdi aldyn ala eskerip, marshrýtyn jańa sqemaǵa sáıkes josparlaýǵa shaqyrylady.
Eske salaıyq, Jeltoqsan kóshesindegi BRT jelisiniń qurylysy 2025 jyldyń sáýir aıynyń sońynan bastalǵan bolatyn. Memlekettik satyp alý saıtynyń málimetinshe, bul jelige 4 mıllıard teńgeden astam qarajat jumsalǵan jáne ol keminde jeti jyl qyzmet etýi tıis.
Jańa velojolaqtyń paıda bolýy elektr samokattardyń júrý máselesin ishinara sheshýi múmkin. 25 tamyzdan bastap Almatyda elektr samokattardyń trotýarlarmen júrýine tyıym salynady.