Almaty-1 temirjol vokzalynda aýyr zardaptarǵa ákelýi múmkin oqıǵa boldy. Mas kúıindegi úsh er adam júrip bara jatqan poıyzdyń baspaldaǵyna sekirmek bolyp, mashınıst kabınasyna bógde zattar laqtyrǵan. Saldarynan mashınıst avarıalyq tejegish qoldanýǵa májbúr boldy, dep habarlaıdy infohub.kz.
QR İİM Kóliktegi polısıa departamentindegilerdiń aıtýynsha, oqıǵa Almaty-1 stansıasynda bolǵan. Quqyq qorǵaý organdary temirjol kóliginde júris-turys erejesin óreskel buzyp, poıyz qozǵalysyna naqty qaýip tóndirgen úsh azamatty ustady.
Buzýshylardyń jeke basy anyqtaldy — olar Jambyl jáne Almaty oblystarynyń 32 ben 35 jas aralyǵyndaǵy turǵyndary bolyp shyqty. Almaty — Atyraý baǵytyndaǵy jolaýshylar poıyzy jónelgen sátte olar lokomotıvtiń baspaldaǵyna sekirmek bolyp, tutqadan ustaǵan. Bul kezde olar mashınıst kabınasyna bógde zattar laqtyra bastaǵan.
Adamdardyń qaýipsizdigine tóngen qaýipke baılanysty mashınıst avarıalyq tejegish qoldanǵan. Poıyzdyń jospardan tys toqtaýy eki mınýtqa sozyldy.
Ustalǵandarǵa qatysty ákimshilik is qozǵaldy. Negiz retinde qoǵamdyq oryndarda аlkogóldik ishimdik ishý nemese mas kúıinde júrý, sondaı-aq temirjol kóligi nysandarynda júris-turys erejesin buzý alyndy.