Almatyda qala ákimi Darhan Satybaldynyń tapsyrmasymen zańsyz qurylysqa, sonyń ishinde maqsatty jer sanaty jeke turǵyn úı qurylysyn kózdemeıtin — baqsha nemese jeke qosalqy sharýashylyq ýchaskelerinde turǵyn úı salýǵa qatań baqylaý kúsheıtildi. Bul týraly infohub.kz saıty habarlaıdy.
Almaty qalasy ákimdiginiń baspasóz qyzmeti málimdegendeı, baqylaý qurylys jumystary bastalǵannan nysandy paıdalanýǵa qabyldaǵanǵa deıingi barlyq kezeńde júrgiziledi.
Qalalyq qurylys baqylaý basqarmasynyń dereginshe, jyl basynan beri qalada 52 zańsyz salynǵan nysan tolyq nemese ishinara buzyldy.
Basqarmada atap ótkendeı, 2026 jylǵy 1 shildeden bastap Qazaqstan Respýblıkasynyń jańa Qurylys kodeksi kúshine enýimen memlekettik sáýlet-qurylys baqylaýy men qadaǵalaýyna degen kózqaras ózgerdi. Buryn jeke turǵyn úı qurylysy jeńildetilgen tártippen júrgizilip, basqa nysandardaǵydaı qurylys baqylaýymen tolyq qamtylmaıtyn. Jańa zańnama bul sharttardy ózgertti. Qazirgi tańda zańnamada ruqsat berý rásimderinen ótýge, qurylysty jobalaýǵa deıingi jáne jobalyq daıyndyqqa qoıylatyn talaptar jańartyldy.
Bul ásirese maqsatty jer sanaty jeke turǵyn úı qurylysyn kózdemeıtin ýchaskelerde jeke turǵyn úıler salynǵan jaǵdaılar tirkelip otyrǵan Almaty úshin mańyzdy.
«Jer ýchaskesiniń bolýy onyń ústine kez kelgen parametrmen jáne maqsatpen nysan salýǵa quqyq bermeıdi. Qurylys jer ýchaskesiniń maqsatty sanatyna, qala qurylysy reglamentterine jáne zańnama talaptaryna saı bolýy tıis», — dep atap ótti qurylys baqylaý basqarmasynyń basshysy Oljas Tólebaev.