Almatylyq áıel alaıaqtardyń qurbany boldy. Olar ony úlken somadaǵy aqshany kýrer arqyly «deklarasıalaý» degen jeleýmen berýge sendirdi. Biraq qyraǵy kýrer qylmystyq jospardy buzyp, polısıaǵa habarlasty, dep habarlaıdy infohub.kz.
Almaty polısıa departamentiniń málimetinshe, kýrer jetkizý tapsyrysyn alyp, zeınetker áıelden djınsy men birneshe bankasy bar paketti alǵan. Áıeldiń minez-qulqy oǵan kúdikti kóringen: ishinde ne bar degen suraqqa ol turaqsyz jaýap bergen. Úıden biraz qashyqtyqqa ketken soń, kýrer jetkizýdi jalǵastyrmaı, polısıaǵa habarlasqan.
Túrksib aýdanynyń polıseıleri dereý kórsetilgen mekenjaıǵa keldi. Oqıǵa ornynda anyqtalǵandaı, buǵan deıin zeınetkerge alaıaqtar qońyraý shalǵan. Olar ózderin sheteldegi týysymyz dep tanystyryp, áıeldi bar jınaǵan aqshasyn shuǵyl kómek retinde berýge kóndirgen. Sodan keıin ony tolyq aldaý úshin «rásimdelmegen aqshany tekserý» degendi aıtyp, qolma-qol aqshany jalǵan deklarasıalaýǵa berýdi talap etken.
Alaıaqtarǵa senip, áıel 3 myń dollardy djınsysynyń qaltasyna jasyryp, basqa zattarmen birge paketke salyp, kýrerge bergen. Alaıda kýrerdiń azamattyq jaýapkershiliginiń arqasynda qylmystyq jospar buzyldy. Aqsha ıesine qaıtaryldy, alaıaqtyq áreketi boıynsha tekserý júrgizilýde.
Almaty polısıasy kýrerge kórsetken qyraǵylyǵy úshin shynaıy alǵysyn bildirip, dál osy baıqaǵyshtyq pen polısıaǵa ýaqtyly habarlaý qylmystyń aldyn alatynyn eskertedi. Eger sizdiń jaqyndaryńyz, ásirese egde týystaryńyz osyndaı shuǵyl aqsha berýdi suraǵan qońyraýlar alsa, áńgimeni dereý toqtatyp, 102 telefonyna habarlańyz.