16 tamyzdan bastap Almatyda kólik turaǵynyń jańartylǵan erejeleri kúshine endi. Endi qala turǵyndary úıinen 500 metr radıýsta óz kóligine tegin oryn ala alady, dep habarlaıdy infohub.kz.
Almaty qalalyq máslıhatynyń sheshimine sáıkes, komýnaldyq aqyly turaqtardy paıdalaný endi belgilengen ýaqytqa emes, mınýt saıyn tólenedi. Bul ózgeris qaladaǵy barlyq komýnaldyq turaqtarǵa qatysty.
Trotýarlyq tıptegi turaqtarda alǵashqy bes mınýt tegin. Bul ýaqyt jolaýshylardy otyrǵyzý nemese túsirý, sondaı-aq kólikti tıeý nemese túsirý úshin beriledi. Eger kólik uzaǵyraq tursa, tólem jeńildik merzimi aıaqtalǵan sátten bastap esepteledi, biraq alǵashqy bes mınýt toqtaý eskeriledi.
Sonymen qatar, jergilikti turǵyndarǵa tegin turaqqa turý múmkindigi paıda boldy. Kóppáterli úılerde turatyn menshik ıeleri men jalǵa alýshylar óz páterinen 500 metr radıýsta tańdaǵan bir komýnaldyq turaqty tegin paıdalana alady.
Qujatta: «Tegin paıdalanýdy usyný basqarýshy uıymnyń ınternet-resýrsy nemese azamattardyń barlyq ótinishterin qabyldaý men óńdeýdiń biryńǵaı platformasy arqyly berilgen ótinish negizinde júzege asyrylady», — dep kórsetilgen.
Mańyzdysy, tegin turaq bir páterge bir kólikke beriledi. Alaıda bul jeńildik jerasty, aıyrbastaý, kópdeńgeıli jáne mehanıkalandyrylǵan turaqtarǵa qoldanylmaıdy.
Sondaı-aq, turaqtarda nómirin anyqtaý qıyn nemese ony jasyrýǵa nemese ózgertýge bolatyndaı etip ornatylǵan kólikterdi qaldyrýǵa tyıym salynady.
Megapolıs turǵyndary turaq aqysyn keıin tóleı alady. Tólemdi kólik turaqqa qoıylǵan kúni saǵat 23:59-ǵa deıin jasaýǵa bolady. Trotýarlyq tıptegi komýnaldyq turaqtardyń ózi endi 8:00-den 20:00-ge deıin jumys isteıdi.