Almatyda buryn qupıa bolǵan Jańǵaq toǵaıy tanymal bola bastady. Kursiv LifeStyle bul orynǵa alǵashqylardyń biri bolyp baryp, onyń nelikten tańǵaldyratynyn jáne munda ne isteý josparlanǵanyn aıtady, dep habarlaıdy infohub.kz saıty.
Joba jetekshisi Baýyrjan Rahmatýlınniń aıtýynsha, aýmaqty abattandyrý 2023 jyly bastalǵan. Ony qala turǵyndary úshin úlken demalys aımaǵyna aınaldyrýdy josparlap otyr.
Rahmatýlınniń sózinshe, toǵaıǵa Qazaqstanǵa kóship kelgen orys ofıseri jáne seleksıoner Vácheslav Shaıdýrov ıelik etken. Oǵan jer bólinip, ol jerde áıelimen birge turǵan.
«Shaıdýrov ósimdiktermen aınalysyp, mektep oqýshylaryn ekskýrsıaǵa osynda alyp keletin. Toǵaıda sıren men jeti túrli jańǵaq ósirilgen. Toǵaı sol kúıinde qaldy», — deıdi joba jetekshisi.
Búginde aýmaq boıynsha eki negizgi jolmen júrýge bolady. Onyń biri anaǵurlym jaıpaq jáne tynysh serýenge yńǵaıly, ekinshisi tik betkeımen ótip, baspaldaqtarmen jabdyqtalǵan.
Jaıpaq jol bulaq boıymen ótip, aýmaq boıynsha birtindep joǵary kóterilýge múmkindik beredi. Jol boıynda jeke alańdarǵa aparatyn tarmaqtar bar. Olardyń keıbiri abattandyrýdyń alǵashqy kezeńderinde paıda bolǵan.
Alańdarda sportpen aınalysýǵa, medıtasıa jasaýǵa nemese jaı ǵana tabıǵat aıasynda ýaqyt ótkizýge bolady.
Ári qaraı joldar úlken amfıteatrǵa aparady. Bolashaqta munda kıno kórsetilimderin, teatr qoıylymdaryn jáne basqa da is-sharalardy ótkizý josparlanýda. Keńistikti jaryqtandyrylǵan úlken lústra bezendiredi. Janynda kelýshilerge arnalǵan dárethanalar da jabdyqtalǵan.
Amfıteatrǵa jaqyn jerde taǵy bir serýen aımaǵyn jabdyqtaý josparlanýda, ony joba avtorlary ózderiniń «Arbaty» dep ataıdy. Onda jol keńirek bolady, osylaısha keńistik baıaý serýendeýge qolaıly bolady.
«Biz búkil keńistikti tabıǵı materıaldardan jasaǵymyz keledi. Munda tek paıda úshin jasalatyn bet-beınesi joq qurylystar bolmaıdy. Eń aldymen, bul oryn adamdarǵa rahat syılaýy kerek», — dedi Rahmatýlın.
Jetekshiniń aıtýynsha, bastapqyda toǵaıdy kelýshilerge ashýdy josparlamaǵan. Bir apta buryn bir otbasy ishke kirýge ruqsat suraǵan.
«Keıin kelýshilerdiń biri bloger ekeni anyqtaldy. Áleýmettik jelilerde vıdeo jarıalanǵannan keıin toǵaıǵa qyzyǵýshylyq kúrt ósti. Rolık shamamen saǵat 11:00-de jaryqqa shyqty, al 14:00-ge qaraı adamdar kele bastady. Senbide toǵaıǵa shamamen 300–400 adam kelse, jeksenbide myńnan astam adam keldi», — dep bólisti Rahmatýlın.
Kirý baǵasy jáne mekenjaıy
Lokasıaǵa degen úlken qyzyǵýshylyqqa baılanysty qazir kelý erejeleri jańartylýda. Kún saıyn tańǵy 07:00-den 11:00-ge deıin toǵaıǵa kirý tegin, al qalǵan ýaqytta eresekter úshin 1500 teńge bolady. 14 jasqa deıingi balalar men zeınetkerler úshin kirý tegin.
«Aýmaqty kez kelgen jaǵdaıda kútip ustaý jáne aqtaý kerek. Bizge resepshnge adam jáne tártipti qadaǵalap, tazalaıtyn qyzmetkerler jaldaýǵa týra keledi», — deıdi avtor.
Jańǵaq toǵaıynyń tolyq ashylýyn avtorlar qyrkúıek aıyna josparlap otyr. Mekenjaıy — Gornyı Gıgant shaǵyn aýdany, 255.