15 shildede Almatynyń birneshe aýdanynda jappaı elektr jaryǵy sóndi. «Alataý Jaryq Kompanıasy» AQ málimetinshe, sebebi – elektr jelilerindegi tehnologıalyq aqaýlar. Bul týraly 24.kz habarlaıdy.
Kompanıanyń baspasóz qyzmetiniń túsindirýinshe, 15 shildede qalanyń ártúrli aýdandarynda tehnologıalyq aqaýlar oryn alyp, saldarynan tutynýshylardyń bir bóligine elektr qýaty ýaqytsha shektelgen. «Tehnologıalyq aqaýlardyń sebepteri anyqtalýda. Oqıǵa ornynda «Alataý Jaryq Kompanıasy» AQ-nyń jedel jóndeý brıgadalary jumys isteýde. Mamandar bolǵan oqıǵanyń sebebin anyqtaý jáne tutynýshylardyń elektrmen jabdyqtalýyn múmkindiginshe tez qalpyna keltirý úshin qajetti sharalardy qabyldaýda», – delingen baspasóz qyzmetiniń habarlamasynda.
Kompanıanyń dereginshe, saǵat 15:50-de Rysqulov dańǵyly, Jangeldın, Baıanaýyl jáne Shemákın kósheleriniń aralyǵyndaǵy tutynýshylar ýaqytsha jaryqsyz qalǵan. Saǵat 15:55-te Serikov, Omarov, Jansúgirov jáne Artıllerıskaıa kósheleriniń aralyǵyndaǵy tutynýshylarda elektr qýaty óshken. Saǵat 16:45-te Pochtovaıa, Bondarenko, Mýsorgskı jáne Grıboedov kósheleriniń aralyǵyndaǵy tutynýshylar shektelse, saǵat 16:55-te Abaı dańǵyly, Masanchı, Jambyl jáne Ádi Sháripov kósheleriniń aralyǵyndaǵy tutynýshylar jaryqsyz qalǵan.
Eske sala keteıik, buǵan deıin «Alataý Jaryq Kompanıasy» AQ-nyń avarıalyq jaǵdaılar kartasynda Almatynyń birneshe aýdanynda elektr qýatynyń óshirilgeni kórsetilgen edi. Keıin Bostandyq aýdanyndaǵy Asqar Taý jáne Ermensaı shaǵyn aýdandarynda elektrmen jabdyqtaý qalpyna keltirildi. Ondaǵy ýaqytsha elektr qýatynyń óshýine abonenttik transformatorlyq qosalqy stansıalardaǵy tehnologıalyq aqaý sebep bolǵan.